كل مرة أغرب من اللي قبلها.. أحلام "الملكة" وتاريخها مع صدمة الجماهير

الاثنين 30 يوليو 2018 15:15
كتب: ندا عصام

مانقدرش ننكر إن التغيير من الوقت للتاني مطلوب وخصوصًا من ناحية الشكل، بس المهم إنه يكون مناسب ليك، مش أي حاجة وخلاص، وده اللي بتحاول تقدمه "الملكة" أحلام كما تصف نفسها، دايمًا بتخترع، وتبتكر تقاليع جديدة كنوع من التجديد، ومن ناحية تانية للفت، وجذب انتباه الجمهور لها، أحلام دايما واثقة من نفسها حتى لو اللي بتعمله غريب بس هي شايفة نفسها كدة، واللي يقول غير كدة يبقوا على حد كلامها "مقهورين".



أحلام فاجأت الجمهور إمبارح بسلسلة صور ليها نشرتها على حسابها الرسمي بموقع تبادل الصور والفيديوهات الشهير "إنستجرام"، ظهرت من خلالها وكأنها مش هي، واحدة تانية خالص، ميكب غير ملامحها جدًا لدرجة ان الناس افتكرتها الفنانة سمية الخشاب، وانقسم رواد مواقع التواصل الاجتماعي لفئتين، فئة أكدت وبكل ثقة أن اللوك غريب ومش مناسب ليها ولا لعمرها وكانت تعليقاتهم كالتالي: "إيه اللي انتي عاملاه في نفسك ده، اللوك مش حلو عليكي، الله يعطيني ثقتك بنفسك"، ولكن الجانب الأخر شايف أنها قمر، ودايما صاحبة الإطلالات المختلفة والجريئة.






ودي مش المرة الأولى اللي بتظهر فيها لجمهورها بشكل غريب أو غير مناسب لها، مما يعرضها لانتقادات شديدة.

إيلاينر أحلام .. "ماركة مسجلة"

ظهرت أحلام، بلوك جديد وغريب في حلقات برنامج اكتشاف المواهب "ذا فويس" برسمة عين مختلفة تشبه الماركة المشهورة Adidas، مما جعل الناس في حالة استغراب.

 


فستان أحلام الموف

إطلالة أحلام، المرة دي كانت عجيبة، في حفلها اللي أحيته على مسرح بلاديوم في العاصمة البريطانية، ظهرت وهي مرتدية فستان موف اللون، من Gucci، تفصيلته لم تتناسب معها على الإطلاق، بس في النهاية ده مش جديد عليها.



أحلام والنضارة المرصعة بالألماس.. "مين قدها"

استمرت الملكة، في خلق التقاليع، للفتت النظر لها من خلال النظارة المرصعة بالألماس.



أحلام والوشم البدوي على جبينها ودقنها.. "الجرأة حلوة"

 في إبهار الجميع، فظهرت في الحلقة الثالثة من العروض المباشرة في "ذا فويس"، بشكل جديد مما وصفها البعض بالجرأة، فرسمت على ذقنها وجيبنها رسومات أشبه برسومات البدويات، مما جعلها محط انتقادات.