أخرهم الحضري.. 3 مشاهير أطلقوا على نفسهم "رقم واحد"

الثلاثاء 26 يونيو 2018 12:35
كتب: ندا عصام

 يبدو أن لقب "نمبر وان" أًصبح هوس كبير لناس كتير الفترة اللي فاتت، وبالأخص عند الفنانين، وده بحكم رصيدهم الفني وما قدموا من أعمال، فاللقب ده أغلبهم أطلقوه على نفسهم لأنهم شايفين أنهم يستحقوا عن جدارة وبتشجيع من جمهورهم الواقفين دايمًا في ضهرهم، ودي حاجة بتزعل ناس كتير منهم في نفس الوقت.

الحضري

والجديد بقى إن "رقم واحد" مابقاش للفنانين وبس، لأ ده انضم للقائمة كمان حارس مرمى المنتخب المصري الكابتن عصام الحضري، وفي جلسة تصوير اللاعبين قبل كأس العالم ظهر من خلالها، وهو مرتدي تيشرت منتخب مصر ورافع يده اليمنى بعلامة "رقم 1"، فالحركة دي مش من فراغ، "الحضري" كان قاصدها فهي رسالة حب يوصلها إن مفيش زيه وهو رقم واحد فعلًا، وهو ما تداوله رواد مواقع التواصل الإجتماعي بعد تألقه بالأمس، وده بشهادة الجميع "ده كفاية رقمه القياسي يعني".



أحلام

وطبعًا منقدرش ننسى المطربة الإماراتية أحلام، اللي دايما بتتكلم عن نفسها إنها "الملكة" ورقم واحد، سواء بالإشارة أوبالكلام، فدايما في برامجها وحفلاتها رافعة يدها لتوضح لجمهورها إنها "نمبر وان"، وجمهورها الصراحة مشجعها على كدة، ومؤكدين بشدة أنها تستاهل، وماينفعش ماتبقاش غير رقم "1".




محمد رمضان

نيجي بقى لـ"الأسطورة" اللي آثار حالة كبيرة من الجدل خلال اليومين الماضين بكليب أغنيته الجديدة "نمبر وان"، ودي بقى رسالة قوية لكل من هاجمه وانتقده بعد ما قاله عن زملائه الفنانين في رمضان الماضي، والتقليل منهم بشكل غير لائق على الإطلاق خصوصًا أن كان في نجوم كبار ماينفعش الغلط فيهم مثل الزعيم عادل إمام ويحيى الفخراني وغيرهم من النجوم، بس رمضان حب يوصل رسالة شديدة اللهجة، زعلت منه ناس كتير أوي.