خدلك فكرة واشتري بكرة ...أفلام العيد

الخميس 14 يونيو 2018 12:15
كتب: ندا عصام

بعد زحمة مسلسلات رمضان ومتابعة 30 حلقة بين الكوميديا والدراما والاكشن، الكل بعدها بيستنى مرحلة أفلام العيد، والعيد ده فيه أفلام كتير مختلفة عن بعض بشكل كبير فهنسهل عليك ونختصرلك الطريق لو عايز تروح أفلام بس مش عارف تروح ايه.


حرب كرموز

لو عايز فيلم أكشن و حركات وحكاوي، عليك وعلى "حرب كرموز" اللي بيشارك فيه  أمير كرارة وغادة عبد الرازق ومحمود حميدة وروجينا وفتحي عبد الوهاب، وكمان مكلفين المرادي وجايبين النجم الإنجليزي سكوت اكينز المشهور بسلسلة أفلام الأكشن «بويكا»، وأحمد السقا زى ما ظهر كدور شرف في رحيم كمان هيظهر في حرب كرموز في دور شرف كظابط "مولعها دخول مفاجئ الفترة دي".

الفيلم بيدور أحداثه حوالين "يوسف المصري" اللي بيسكن في حي كرموز في اسكندرية، وبيدخل بعدها في مشاكل ومعارك مع جيش الاحتلال الانجليزي علشان ينقذ فتاة من تعرضها للاغتصاب، والظاهر كده على رأيهم "الحرب ابتدت".

 


أبلة طمطم

لو بتدور على فيلم كوميدي وكمان مناسب للأطفال علشان الخروجات العائلية فشوف  "أبلة طمطم" بطولة ياسمين عبد العزيز. الفيلم بيمثل فيه كمان حمدي الميرغني وبيومي فؤاد وأيمن وتار وغيرهم.

"أبلة طمطم" بيدور حول هروب مجموعة مساجين من خلال نفق سري تحت الأرض، وبعدها يتفاجئوا انهم داخل مدرسة نموذجية، فيقرروا يفضلوا فيها شوية، في ظل مقاومة من "الأبلة طمطم".




كارما

عايز بقى دراما اجتماعية، ادخل "كارما" وهو عودة للمخرج خالد يوسف للسينما بعد غياب سنين طويلة، عمرو سعد هيظهر في الفيلم بشخصيتين وكان فيه جدل حوالين الفيلم اليومين اللي فاتوا لانه اتمنع من العرض وبعدين تم التصريح ليه بالعرض تاني.

«كارما» بطولة غادة عبدالرازق وعمرو سعد وخالد الصاوي وزينة ودلال عبد العزيز وماجد المصري.



ليلة هنا وسرور

لو عايز بقى فيلم تفصل دماغك بعد الكحك وكباية الشاى بلبن اللي أخيرا هتشربها الصبح فممكن تجرب "ليلة هنا وسرور" اللي بيجمع محمد إمام وياسمين صبري، ودي مش أول مرة يطلعوا مع بعض، قبل كده جمعهم "جحيم في الهند" وحقق الفيلم إيرادات عالية جدا.

"ليلة هنا وسرور" بيدور حوالين ضابط مخابرات مصري بيتنكر في شخصية رجل أعمال اسمه"سرور" يقع في حب "هنا"، وده وقت توليه مهمة خطيرة تتورط فيها واحدة من العصابات الإجرامية الكبيرة، بيشارك في الفيلم كمان فاروق الفيشاوي ومحمد سلام وأحمد السعدني.



قلب أمه

عايز كوميديا بقصة مختلفة، يبقى لازم تروح "قلب أمه" بطولة هشام ماجد وشيكو، الإعلان لوحده كسر الدنيا وفي فنانين كتير اشادوا به.

"قلب أمه"  بيدور حول زعيم عصابة اسمه "مجدي تختوخ" بيدخل في مشاجرة بيتصاب فيها ويتم نقله للمستشفى وبيحتاج لنقل قلب، وفي نفس الوقت تتوفى والدة "يونس" فيلجأ اﻷطباء إلى نقل قلب والدته إلى "تختوخ" ﻹنقاذ حياته، فبيتعامل مع "يونس" بطريقة حنان الأم وخوفها عليه.. "قولي ماما".