أكتر من نصف الفريق.. 4 حراس صنعوا التاريخ في كأس العالم

الاثنين 9 يوليو 2018 14:34
كتب: محمد جمال

لاعيبة كتير بتتظلم مع أنديتها أو منتخبات بلادها لمجرد أنهم مش مهاجمين وأنهم مش بيسجلوا أهداف.

ولكن دور هؤلاء اللاعبين لا يقل عن دور المهاجم وممكن يكون أفضل كمان لكن الإعلام مبيسلطش الضوء عليه وعشان كدا بنسميهم الجنود المجهولة.

في كأس العالم 2018 اللي بيتلعب في روسيا حاليًا واللي وصل للدور نصف النهائي بوصول 4 منتخبات وهم بلجيكا وفرنسا وكرواتيا وإنجلترا في لاعيبة قدمت مستويات هايلة مع المنتخبات الأربعة وتقدر تقول أنهم كانوا سببًا رئيسيًا في وصول منتخبات بلادهم للدور نصف النهائي.

الصدفة بقى إن اللاعبين الأربعة في مركز واحد ومش مركز المهاجم ولكن مركز حراسة المرمى اللي لعب دور مهم جدًا في المباريات الأخيرة.

 

·       هوجو لوريس "فرنسا"

منتخب فرنسا بيقدم عروض قوية جدًا قدر أنه يتصدر مجموعته وبعد كدا يتخطى الأرجنتين وأوروجواي ويصل لنصف النهائي.

لوريس حارس مرمى فرنسا كان له دور مهم جدًا في وصول فرنسا للمكانة د يومين يقدر ينسى التصدي الأسطوري له في مباراة فرنسا الأخيرة أمام أوروجواي.

وأنقذ لوريس مرماه من هدف محقق من كرة رأسية لمارتن كاسيرس في الدقيقة 43 من عمر الشوط الأول كانت كفيلة بعودة المباراة لنقطة الصفر وتهديد تأهل فرنسا.



 

·       تيبو كورتوا "بلجيكا"

تأهل منتخب بلجيكا على حساب البرازيل في واحدة من المفاجآت الكبيرة في مونديال روسيا.

وفي المباراة اللي انتهت 2-1 لصالح بلجيكا كان النجم الأول في المباراة حارس المرمى كرتوا اللي أنقذ مرماه من أهداف الجملة أمام لاعبي البرازيل.

وأصبح كورتوا أحد أهم عناصر القوة في منتخب بلجيكا واللي بيمنحم الثقة في المباريات.




·       دانييل سوباسيتش "كرواتيا"

دا بقى حكاية لواحده قدر يعبر بمنتخب كرواتيا مرتين الأولى في دور الـ16 لما كانوا بيلاعبوا الدنمارك وقدر يصد 3 ضربات جزاء واحدة في المباراة و2 في ركلات الجزاء الترجيحية بعد ما انتهت المباراة بالتعادل.

وتألق سوباسيتش حارس مرمى موناكو في مباراة كرواتيا أمام روسيا في ركلات الجزاء الترجيحية أيضًا وتصدى لركلتي جزاء ليمنح منتخب بلاده فرصة المشاركة في الدور نصف النهائي.


 


·       جوردان بيكفورد

لما يكون عندك حارس زي بيكفورد لازم تكون مطمن جدًا خاصة في ظل المستوى الرائع اللي بيقدمه اللاعب في المباريات.

ونجح بيكفورد في منح إنجلترا بطاقة التأهل لدور ربع النهائي في ركلات الجزاء أمام كولومبيا.

وفي مباراة إنجلترا الأخيرة أمام السويد كان بيكفورد من أبرز اللاعبين وأحد أفضل نجوم المباراة حتى أنه حصل على لقب أفضل لاعب في اللقاء.