إنجليزي دا يا مرسي.. نجوم عرب خلو الإنجليزي "فيومي"

الأحد 8 يوليو 2018 12:01
كتب: محمد جمال

"من قال لا أعلم فقد أفتى" حكمة دايمًا بنسمعها من الناس الكبيرة واللي أكثر دراية بشئون الحياة ولو دققت النظر شوية في الجملة ومعانيها هتوصلك بكل ما تحمله من معاني فعلا لو قولت معرفش فانت كدا أفتيت ومش عيب أنك تقول مش عارف العيب أنك متكنش عارف وتفتي في أي كلام وخلاص.

يعني متعرفش حاجة وحد بيسألك قول معرفش مش لازم تفتي على فكرة مش هيبقى شكلك وحش لو قولت معرفش محدش هيلومك ولا هياخد روحك عشان أنت متعرفش لأن محدش أتولد يعرف كل حاجة وكلنا كل يوم بنتعلم.

بس اللي يدايق فعلًأ ويحرق الدم لما تلاقي حد بيفتي مع نفسه من غير ما حد يسأله أو يوجهله كلام لأنه حب يتمنظر على الناس بكلمتين يعرفهم وهاتك يا فتي لحد ما يقع في شر أعماله ويبقى مسخرة السوشيال ميديا.

الفتي المرة دي كان في اللغة الإنجليزية لما حد ميكنش عارف إنجليزي كويس وتلاقيه بقى بيتمنظر ودا اللي فكرنا بجملة شهيرة في المسرح المصري وتحديدًا مسرحية مدرسة المشاغببين في مشهد بين النجمين سعيد صالح ويونس شلبي " دا إنجليزي دا يا مرسي .. لا دا فيومي".

 

·       كريم حسن شحاتة

كان السبب الأول في أنه خلانا نكتب الكلمتين دول خاصة بعد ما علق امبارح على اللوحة اللي كانت في مباراة إنجلترا والسويد واللي اتصور معها اللاعبين وتحمل عبارة " no racism " وعلق عليها أنها لا للإرهاب في حين أن الجملة تحمل معنى لا للعنصرية.

بس دا مكنش أول مرة لكريم لأنه متعلمش من الخطأ اللي وقع فيه بخصوص استفتاء المرشحين للفوز بالكرة الذهبية في عام 2018 واالي كان متصدرها صلاح على حساب رونالدو وميسي.

وكانت نسبة التصويت لصلاح 62 % وميسي 15% ورونالدو 22% وهناك واحد في المية بعنوان " someone else " وأفتى كريم أن دا اسم لاعب.

لمشاهدة فيديو كريم حسن شحاتة اضغط هنا 


·       توفيق عكاشة  

بصراحة مش كريم حسن شحاتة بس اللي بيفتي لكن كان فيه البرلماني توفيق عكاشة ودا له مواقف كتير أوي منها مثلا لما كان بيقول اسم ليوناردو دي كابريو أو مثلا لما كان بيقول بيت الحرية الأمريكي.



 

·       فيفي عبده

محدش هيقدر ينسى موقف فيفي عبده في أحد البرامج مع نيشان لما أكدت أنها بتتكلم إنجليزي كويس جدًا وجت تقول الأمس " yesterday" قالت " tomorrow " قبل ما يلحقها نيشان.



 

·       أحلام

الفنانة أحلام أيضًا لها سقطة في أحد البرامج بعد ما حاولت تقول كلمة اختيار بالإنجليزي " Choose" فقالتها بشكل خاطئ ولكنها لم تحاول مرة أخرى العودة إلى الكلمة.



 

·       يوسف سيف

زي ما بدئنا الموضوع بشخصية رياضية حبينا ننهيه بشخصية رياضية أيضًا مع المعلق يوسف سيف في إحدى مباريات بايرن ميونخ وتشيلسي توقف اللعب وكتب على الشاشة "WATER BREAK" في إشارة إلى وقت مستقطع لأجل شرب الماء.

وظن المعلق الرياضي أن هذا اسم لاعب وستم تبديله مع فرانك ريبيري لاعب البايرن ميونخ.



/iframe>