ما بين"شاهيطاز" و "بعبيكي".. 4 أسامي عجيبة في رمضان

الخميس 7 يونيو 2018 12:50
كتب: ندا عصام

اسم الشخصية اللي بيقدمها الفنان في أي عمل بتفضل معاه لفترة طويلة، خاصة لو كانت الشخصية دي حققت نجاح كبير، فتقدر تقول كدة الناس بتناديه بالأسم ده كأنه اسمه اللي مكتوب بالبطاقة، وفي الدراما الرمضانية لهذا العام لاحظنا أن في اسماء جديدة، وغريبة لأول مرة تعدي علينا، ياترى الأسماء دي هتبقى موضة 2018 ولا إيه، تعالوا نفتكرهم الأول، لأن الموضوع فيه "بعبيكي"، و"شاهيطاز"، و"ليلة كبيرة أوي سعادتك".


بعبيكي

ظهر نجم مسرح مصر كريم عفيفي، في مسلسل"سك على اخواتك"، مع على ربيع بشخصية شاب صعيدي يدعى "بعبيكي"، ولما سمعنا الاسم ده الكل استغرب إيه الاسم ده، ومعناه إيه اللي لسه مش عارفينه لحد دلوقتي، خصوصا انه ماعداش علينا قبل كده، والظاهر إن الأسامي الغريبة دي لأنها بتسمع و"بتاكل" مع الناس أوي وبيفضلو فاكرينها، كانت أحد أسلحة علي ربيع لإنجاح مسلسله.

 


شاهيطاز

ريم مصطفي، السنة دي شدت الجمهور ليها باسم "شاهيطاز العلا جلال"، وهي شخصيتها في مسلسل" الوصية"، ففي البداية الكل كان فاكر ان اسمها "شاهي"، لحد ما اكتشف أكرم حسني الاسم الحقيقي في المسلسل، وكان في حالة تعجب وهستريا ضحك رهيبة من السوشيال ميديا على أكرم حسني اللي كان بيذلها، وعملها زفة باسمها في الشركة، "شاهيطاز" زي ما فهمتنا ريم مصطفى في المسلسل هو "تلألؤ قطرات الندى على الجرجير يوم التلات".


 


هتلر

طبيعي إن عدو محمد رمضان يكون حاجة تخوف، وبسبب ده سيد رجب اختار اسم" هتلر" ليلازمه طوال الأحداث في مسلسل" نسر الصعيد"، وعلى الرغم إن الإسم مش غريب أوي، بس الصراحة الإسم مع الشنب والجلابية تحسه "هتلر هتلر يعني مفيش كلام".

 



غضبانة


ظهرت سلوى خطاب، في مسلسل "سك على اخواتك" بشخصية صعيدية واختارت اسم شخصيتها اللي هي"غضبانة" ، مما تفاعل الكثير من رواد مواقع التواصل الاجتماعي على اسمها لأنه غريب فدايمًا في سؤال مضحك محيرهم "غضبانة" ده اسمك ولا حالتك النفسية؟