أهمهم "السقا" و"باشا مصر" و"النمبر وان".. 6 قدموا الأكشن على الطريقة المصرية

الخميس 28 يونيو 2018 11:33
كتب: ندا عصام

 

أدوار الاكشن مش اي حد يعملها، ويقنعك بيها، وعموما تعتبر من أصعب الأدوار اللي بيقدمها الفنان طوال مشواره الفني، دور بيتطلب ترتيبات، ومجهود كبير جدا علشان يطلع الدور على مستوى يناسب ويليق بالجمهور ، واحنا عندنا فنانين كتير قدموا الدور ده سواء في السينما أو الدراما، يلا بينا نتكلم عنهم، ونشوف مين فيهم يكسب في الأكشن.

 

السقا

طبعا من غير مقدمات أو تفكير اول ما نيجي نتكلم على الاكشن في مصر، تلقائيا اول واحد هيجي في بالك النجم الجميل أحمد السقا ملك الاكشن والحركات، نط تلاقي ضرب تلاقي نار تلاقي، وأكثر ما يميز السقا في الدور ده بالتحديد انه مش مستحب بالنسبة له الإستعانة بـ "دوبلير"، ودايمًا تلاقيه بيعتمد على نفسه اجتهاد زيادة منه علشان يبقى مقنع اكتر والحقيقة تتحسب في صفه جدا، ومن أشهر الأفلام اللي قدم فيها السقا هذه النوعية "تيتو، إبراهيم الأبيض، الديلر، مافيا، تيمور وشفيقة"، ملك الأكشن المصري مش هنعد وراه.






أمير كرارة

اثبت أمير كرارة، بعد الجزء الأول من "كلبش" انه قادر على إظهار كل ما بداخله من مواهب، نجح في أن يقدم الاكشن على طريقته، في دور الضابط "سليم الأنصاري"، "باشا مصر" كسر الدنيا رمضان اللي فات، اتدرب كتير واجتهد علشان يقنع الجمهور بشخصيته، وكمل باقي الحدوتة في الجزء الثاني رمضان الماضي، وفي "هروب إضطراري"، ظهر بنفس "اللوك"، ومؤخرا شفناه في دور ظابط برضه بس بشكل جديد في فيلم "حرب كرموز"، ضرب وقتل ومجموعة مطارادت ومعارك وحاجات كتير خلت الناس مستنية تشوف الفيلم.

 





محمد رمضان

 من الشخصيات اللي قدموا الاكشن في أكثر من عمل سينمائي ودرامي، ملامح "الأسطورة" على ما اعتقد انها كفيله تقنعك بأن الشخصية مناسبه له، "رمضان" يعني مسكة سلاح في "الأسطورة"، و"الألماني"، ونطة من على الكوبري في "قلب الأسد"، و"شد أجزاء"، ده غير بقى مسلسله الأخير "نسر الصعيد"، بعيدا عن خناقة "النمبر وان"، رمضان بيشتغل على جسمه كويس، وده مخليه مؤهل لإقناعك باللون ده لما يقدمه.





محمد إمام

من الممثلين اللي نفذوا الأكشن في أكثر من عمل درامي وسينمائي ، ولكن على طريقته الخاصة بعيدًا عن أي فنان آخر حتى يكون لنفسه شخصية منفصلة الناس كلها تتكلم عنها، ومشاهد الأكشن بالنسبة لمحمد إمام، تتضمن عضلات وفورمة معينة واستايل خاص يجذب الانتباه، وده شفناه في مسلسل "لمعي القط" وأيضًا في فيلم "ليلة هنا وسرور" الذي يعرض حاليًا بالسينمات ومحقق إيرادات عالية جدًا، "الأكشن كوميدي"، نوع خاص اختاره محمد إمام، وبيتألق فيه كل مرة أكثر من اللي قبلها.

 

 



 أحمد عز

منقدرش ننسى "عز" في الأكشن، يعتبر من أهم الفنانين اللي قدموا مشاهد الأكشن باحترافية شديدة جدًا، "علمت"مع جمهوره، فجسد من قبل دور ضابط في فيلم "بدل فاقد"، وضابط عمليات خاصة في "الخلية"، وكل واحد له تفصيلة مختلفة عن الأخرى، أحمد عز، خاطر بنفسه ونفذ الأكشن الحقيقة على أعلى مستوى.





ياسر جلال

ياسر جلال، ملامحه دايما كانت محصورة في أدوار بعيدة عن نمط الأكشن خالص، بس الظاهر كده ان مسلسل "ظل الرئيس" بداية للطريق، وكمل المشوار في "رحيم"، بعد ما شفناه في مشهد وهو "بينط" والناس كلها اتكلمت عنه في السوشيال ميديا وغيرها من المشاهد، فياتري ياسر اقنعك وهنشوفه في عمل جديد أكشن الفترة اللي جاية.. "ادينا مستنين".