لما التمثيل يقلب بجد في حكايات زواج الثنائيات الفنية

الأربعاء 20 يونيو 2018 17:30
كتب: ندا عصام

الحب مالوش ميعاد ولا شروط، حاجة كدة بتيجي من غير استئذان وخبط لزق، وده انطبق على عدد كبير من الفنانين، اللي كلنا اتفاجأنا بخبر زواجهم بعد قصة حب بعيدة عن عيون الناس، الحكاية كلها حلوة، من بداية ظهورهم على الشاشات مع بعض، ولحد قفص الزوجية.

 

مي سليم ووليد فواز

تحولت قصة مي سليم ووليد فواز، من التمثيل للحقيقة، فكان الاثنان يشاركان في منافسة رمضان 2018 بمسلسل "الرحلة"، لا وإيه ظهروا في شخصيتي زوجين، كان بينهم قصة حب توجت في النهاية بالزواج، ولكن كان في مشاكل تانية واختلافات خلال الأحداث، والموضع ماوقفش على المسلسل وبس، لأ الكل تفاجأ بخبر ارتباطهما بجد وزواجهما اليوم ومباركة أصدقائهم المقربين لهما، وأهم حاجة "يبعد عنهم الناس اللي بره دول"، زي ما تمنت ليهم أخت العروسة ميس حمدان على السوشيال ميديا.





سمية وأحمد سعد

الموضوع ده اتكرر كتير أوي الفترة اللي فاتت فحصل نفس الحوار مع "العلاقة الروحانية" نقصد سمية الخشاب وأحمد سعد، اللي انكروا أن في علاقة حب بينهما خصوصًا تواجدهما في أكثر من مكان سويًا سواء في الحفلات الغنائية أو مهرجانات وغيرها، وجمع بين أحمد وسمية أغنية "بالحلال"، فالجمهور بعد ما كان شاكك في العلاقة وقتها بقى كان في تأكيد، وفي النهاية كل حاجة بانت وماستخبتش، واتحولت العلاقة الروحانية لعلاقة حب وفستان فرح قدام الناس.




 شيرين وحسام حبيب

" ياه يا حبيبي كل حاجة بحبها حبيتها بيك.. ياه يا حبيبي، روحي ليل ونهار بتطمن عليك".. الكلام أهو كان واضح زي الشمس، بعد ما شيرين وحسام حبيب جمعهما دويتو "كل ما أغني" وزي ما وضحنا في الكلمات، البعض شك في وجود قصة حب بينهما ولكنهم نفوا ما تم تداوله من أخبار وأكدوا أنها شائعات، وبمرور الوقت اتفاجأنا  إن الكلام ده حقيقة وانتهت الشائعات بخاتم وفستان ومعازيم.. الأغنية ماكنتش من فراغ برضه.




كندة وعمرو يوسف

كندة وعمرو قبل أي حاجة جمعهم أعمال مختلفة بين السينما والدراما وهم مسلسل "عد تنازلي"، وفيلم "برتيتا"، وكانو أصدقاء، لكن محدش توقع إن الصداقة دي هتتحول في النهاية لزواج، فالحب كان أقوى من أي شىء، ودلوقتي عايشين حياة زوجية سعيدة.




والطريقة دي مش جديدة على الإطلاق، لأ حصل قبل كدة أيام زمن فن الجميل وشفنا قصص حب بدأت من تواجدهم مع بعض في أعمال لتكون النهاية جواز، ومثل من ضمن الأمثال الفنان رشدى أباظة وسامية جمال اللي بدأ حبهم خلال تصوير فيلم "الرجل الثاني".