«الجواز حلو» ..اعرفوا ازاي تختاروا صح في 10 خطوات

الاثنين 16 إبريل 2018 12:25
كتب: بسمة قاسم

اختيار شريك العمر من أصعب قرارات الحياة وأمر يحتاج تأني، وتفكير، وحاجات تانية كتير "الموضوع كبير يعني مش هزار"، لكن فيه شيء أساسي مهم لازم كل حد بيتمنى يعيش مبسوط يفكر فيه كويس قبل ما يقدم على خطوة الجواز، وهو الأساس في معظم المشاكل المجتمعية، ألا وهو «الاختيار الصحيح»


 الخوف المرضى من الرهبة الذي يطلق عليه فى علم النفس اسم "الجاموفوبيا"، وهو حالة من الخوف الغير مبرر والخارج عن السيطرة من الزواج، كتير مننا بيكون عنده حالة الخوف من الارتباط أو الزواج أو ماذا يحدث بعد الزواج؟ وكل الناس بتتكلم عن مزايا الزواج ومتاعبه، فهو واقع بيعيشه عدد كبير من الشباب نتيجة لعدد من الأسباب تختلف من شخص لأخر، منها رؤية العديد من التجارب الفاشلة، أو العيش فى منزل عانى من تلك المشاكل بين الأب والأم، و اعتقادا منا إنه كل شيء يحدث بعد الزواج بيكون مترتب علي سوء الاختيار من البداية عشان كده قررنا نتكلم عن اسس الأختيار السليم وطبعًا مش هنتكلم عن «كبسولة سحرية ولا حاجات من الخيال»، بس هنقول كل اللي وصلنا له من وجهة نظرنا المتواضعة.

 

1. في البداية لازم نفكر بايجابية ونسمع أراء المحيطين بينا كلهم لكن قرارتنا متتأثرش بحد، "خد اللي ينفعك بس ماتسلمش ودنك من الأخر يعني".

2. تحديد المخاوف اللي بنعانى منها بالتفصيل، وكل الأفكار اللي سيطرت علينا تجاه الزواج، "لازم تعرف ايه هو العفريت علشان تعرف تصرفه".

3. نكتب كل المخاوف فى ورقة ونجاوب إجابة منطقة على كل سبب دفعنا للخوف من الزواج، وإذا كانت إجابتنا تتدور كلها بين الخوف من العبء والمسؤولية، أتأكدوا أن الأمر مش بالصورة الموجودة في مخيلتكم،وكل اللى اللي مفروض نفكر فيه هو بس إزاي نختار الشخص الصح اللي هيشاركنا مشوار حياتنا.

4. "اختاروا صح وبلاش تسرع" هي دي النصيحة اللي مش لازم تتنسي أبدا لأنها هتحدد شكل حياتكم في المستقبل.

 

5. اعرفوا أن الزواج مش حاجة وحشة زي ما بتعتقدوا أو زي ما صور لكم البعض، هو بداية لمرحلة جديدة لحياتكم، فعلى الأقل هيكون عندكم طفل يحمل من طبعكم وملامحكم، "أهو ضمنتم حاجة حلوة هتطلعوا بيها من الجواز كده كده".

6. محدش خالي من العيوب وبالتالي شريك الحياة لكل حد فينا هيكون زينا بالظبط فيه مزايا وعيوب عشان كده لازم نتقبل شويه العيوب اللى موجوده في غيرنا ونتعامل معاها بمرونة.

7. الجواز مش «بيزنس» هو اختيار لنصنا التاني اللي بنتمني نكمل معاه حياتنا، عشان كده احنا بندور على الشخص المناسب مش الصفقة التجارية المناسبة.

8. لو لقينا شريك حياتنا اللى بنحلم بيه لازم منخليش الماديات عقبة بينا ونحافظ علي علاقتنا بدون تردد

9.  لازم منفكرش فى مشاكل ما بعد الجواز اللى بتحصل مع قرايبنا أو صحابنا سواء كانت طلاق أو خلافات كبيرة، لأنه في النهاية بيرجع لسوء الاختيار من البداية.

10. كلنا عندنا القدرة على العيش في وضع أفضل من خلال طريقتنا فى التعامل مع شريك حياتنا فإذا قدمنا الحب والحنان أكيد هنلاقي أكثر من اللي قدمناه.

وأخيرًا "وهي دي الزيتونة بقى".. نحب نقول لكل بنت وكل ولد إن الجواز امتحان مهم ومادة صعبة، وكلها تفاصيل، وعشان ننجح فيها، لازم نذاكر كويس ونقرأ ونتثقف يعني إيه جواز، وإيه هي أسس الجواز السليم، ونعرف إن الحياة هتكون أجمل مش أوحش، بس لو إحنا اخترنا إنها تكون كده.