"تعرفي تسكتي" و"انا سي السيد".. أهم 5 أغاني "ذكورية" ضد المرأة

الاثنين 2 يوليو 2018 14:12
كتب: ندا عصام

إن الراجل يغني للست ده أمر طبيعي جدًا جدًا سواء كان بقى بيتكلم عنها وبيتغزل فيها "حب وحركات" أو بيوجه لها رسالة قاسية زي ما بيقولوا كدة "من تحت لتحت"، لكن الغريب إن الراجل يغني لنفسه ويفرض رسالته وسيطرته على المرأة يعني تقدر تقول كدة "تحكمات سي السيد" بتظهر على كلامه،  وده شفناه في أكثر من أغنية تقريبًا من نفس اللون، وإحنا النهاردة حبينا نتكلم عن الأغاني دي فتعالوا نشوف.


رامي صبري

رامي في البومه الأخير اللي طرحه كان من ضمن أغانيه، أغنية بعنوان "الراجل" ففي البداية كدة الكل استغرب واندهش مبدئيًا من الاسم ذات نفسه اللي هو "إيه الراجل ده" محدش كان فاهم حاجة خالص، وبعد ما سمعناها، لقينا إن الأغنية جديدة وغريبة وبعيدة عن ألوان رامي، تمامًا اللي قدمها قبل كدة، هي رسالة للفتيات تحث على طريقة معاملتهن للرجل وإزاي تحافظ على أسرار بيتها، وزي ما قال "لما الراجل يتكلم الست ماتعندش معاه.. متقولّوش حاضر في كلام يتقال، تاني يوم تنساه"، وطبعا مع المزيكا والتوزيع كان الوضع مختلف، وختم في النهاية بكوبليه "خلص الكلام أما نشوف آخرتها معاكي إيه!".. "لما نشوف أخرتها معاك انت يا عم رامي؟!"




تامر حسني

زي فيلم "سي السيد والست أمينة المطيعة" بالظبط، طبعًا مانقدرش ننسى أغنية "سي السيد"، اللي قدمها تامر حسني، وإن الراجل من حقه يتحكم في الست، ويقول تلبس إيه وتعمل إيه وتخرج إمتى وكلمته لازم تمشي على المسطرة "سيطرة سيطرة يعني"، وكل ده ليه علشان هو "سيد السيد"، ده غير أنه أكد إن إصرارها على المقارنة بيضيع من عينه أنوثتها".. "طب ما يضيع هيحصل إيه يعني؟، وتامر، استمر في نفس النوعية من الأغاني، واتكلم عن الست النكدية لما قال "بطلة العالم في النكد"، لأ ده مستقصد الست بقى.


 




بهاء سلطان

بهاء سلطان برضوا ماكنش سهل، كانت شخصيته قوية أوي وظهرت في أغنية "قوم أقف وأنت بتكلمني"، الأغنية اللي لحد دلوقتي محفورة في الذاكرة، واتصورت على طريقة الفيديو كليب وشاركوا فيها تامر حسني، بهاء كانت لهجته قوية أوي، "قوم أقف، بصلي، وفهمني، ولا تتكلم، وانا بتكلم"، علشان نبقى متفقين بس.


 


مدحت صالح

تجربة جديدة على مدحت صالح، لما قدم أغنية "تعرفي تسكتي"، كلمات ومزيكا حديثة ورسالة معينة للست المستفزة، من ينسى لما قالها : "تعرفي تسكتي ولا اسكتك، ولا انتي الحالة خلاص مسكتك.. بتقولي هتقدر تعمل ايه.. يعني استفزاز عايزة تكملي"، فالواضح كدة إن الرجالة كان جواها كبت ومدحت، خرجه في الوقت ده، فالأغنية عملت ضجة كبيرة وانقسمت ردود أفعال رواد مواقع التواصل الاجتماعي، وفي النهاية كانت من ضمن تعليقاتهم الساخرة: "طلقها وريح دماغك".


 


أبو الليف

علاقة أبو الليف، بالمرأة حددها بأغنيتين أولها "دولا مجانين" لما قال: " دول دول دولا خبلانة اللي فاهمهم راسه تعبانة، تفهم إيه حموك فى كنكة"، بس في رجالة كتير شافت أن الست مجنونة أه، بس وجودها مهم وماينفعش الاستغناء عنها، وأكمل أبو الليف، علاقته بالمرأة لما غنى "أنا مش خرونج لا أنا كينج كونج".