تاريخ الدراما الرمضانية.. "الردح" أسلوب حياة

الأربعاء 13 يونيو 2018 11:43
كتب: ندا عصام

«الردح» في الفترة الأخيرة بقى أسلوب حياة، وإننا نشوفه على الشاشات كان في البداية أمر عجيب، ولكن في الحقيقة انتشر خلال الفترة اللي فاتت وبقى طبيعي جدا، والمعروف أن رمضان شهر الأخلاق والمفترض تجنب هذه النوعية من الأدوار ولكن العكس أصبح هو المعتاد وهذه النوعية انتشرت بشكل كبير، ورمضان "بقى موسم الردح"، وكل فنانة اتبعت أسلوبها الخاص علشان تلفت الانتباه من خلال مسلسلات شفناها خلال المواسم الرمضانية الماضية، وحتى هذا العام من رمضان.

روجينا

روجينا في مسلسل «ضد مجهول» الذي يعرض حاليا على الفضائيات، اتبعت في أكثر من حلقة أسلوب الردح "كعادتها يعني"، سواء مع زوجها أو مرات زوجها، ولكن ردح روجينا مختلف عن أي فنانة فدائما تلاقي نبرة صوتها عالية مع ريأكشنات وجه حادة، ورفعة حاجب.. "تخليك تخاف".

 



سلوى خطاب

 

في الحلقة الأولى من مسلسل «نيللي وشريهان» العام الماضي كان في وصلة ردح كبيرة بين الست صباح وجيرانها في حارة شعبية، وكانت الوصلة كالتالي: «مالها صباح ياعين أمك مش عجباكى جرى إيه ياولية ياطرش البلاعات ياكناسة الحارة انتى نسيتى نفسك ولا إيه ياولية الله يرحم لما كنتي داخلة علينا الشارع الكوع مهبب والوش محبب واللي يصطبح بيكي لا يكسب ولا يتسبب، ده أنا افتح قرنك انتى واللى يتشددلك»، فالست صباح كانت عظيمة في لفت النظر ليها.

 



فيفي عبده وسمية الخشاب

في مسلسل «كيد النسا» اللي اتعرض رمضان 2011 ، كانت في وصلة ردح معتبرة، بين فيفي عبده وسمية الخشاب، وذلك من خلال أغنية «كيد النسا» اللي شاركوا فيها، فسمية سألت فيفي: «تقدري تقوليلي لماذا انتي متكادة ومتغاظة طبعا عشان انتي القديمة وانا لسة فرش وطازة»، لترد فيفي عليها: « انتي فاكرة نفسك ست ده انتي ست شهور يابت يابت أنا افرمك واتويكى واعملك فضيحة على النت»، فوصلة فيفي وسمية كانت مختلفة خالص عن أي ردح تاني بس الصراحة "فوفا تكسب".




دنيا وإيمي سمير غانم

وفي مسلسل «نيللي وشريهان» رمضان الماضي كان في وصلة ردح بين دنيا سمير غانم  واختها إيمي، اثناء حفل زفاف بيومي فؤاد وسلوى خطاب، ليتدخل المطرب حكيم في فض الخلاف بينهما، ولكن طريقة نيللي، في الردح مختلفة من حيث طريقة الكلام والأداء، بينما شريهان بأسلوبها "البيئي" نجحت في انها تكون ظاهرة أكتر.




فيفي عبده

وصلة الردح عند فيفي عبده، معروفة يغني نبرة صوت عالية مع هزة رأس ملهاش حل "تخليك تروح وتيجي معاها"، والأداء والوصلة دي كانت في مسلسل «مولد وصاحبه غايب».. "الله عليكي يا فوفا 5  أمواااه".