لا واقع يهم ولا "راكور" يلم.. 5 غلطات ماتتنسيش في السينما المصرية

الخميس 21 يونيو 2018 12:28
كتب: ندا عصام

 بعد مرور سنين كتير أوي على أفلام سينمائية شفناهان وحفظناها، واتعلقنا بيها، إلا أن في ناس كتير ماخدتش بالها من الأخطاء "المريبة" اللي كانت موجودة بالسيناريو، والمشكلة إنها غلطات ماينفعش تتعدى، بس احنا تقريبا علشان حبينا الأفلام دي اتعاملنا معاها "بالحب"، وعملنا نفسنا مش واخدين بالنا منها.

البحث عن فضيحة

في فيلم "البحث عن فضيحة"، كان في خطأ مالهوش حل يموت من الضحك، وهو لما الجرسون دلق علي بدلة وجزمة عادل إمام، الكريمة، طلع بعدها على المسرح، وسبحان الله، وبقدرة قادر ظهر والجاكت نضيف، والجزمة متلمعة، وأخر شياكة.. "لا سحر ولا شعوذة"، في مشهد مايتنسيش للزعيم، وهو بيستلم الجائزة من ميرفت أمين و بيطلع يجري بعد كده.


 

عسكر في المعسكر

نيجي بقى عند فيلم "عسكر في المعكسر"، العسكري خضر اللي هو محمد هنيدي، كان وحيد ومالهوش أخوات، وفجأة دخل الجيش طب تيجي ازاي دي، سيبنا احنا الغلطة دي، وعيشنا طول الفيلم مع الثأر اللي بين ماجد الكدواني، ومحمد هنيدي.. هنقول إيه "السيناريو المصري أم الأجنبي".



أبو علي

الشقيق الأصغر لكريم عبد العزيز في فيلم "أبو علي" بقى لما الراجل رمى حدفه على "مؤخرته"، وراح بعدها للمستشفى اتضح إن عنده ثقب في القلب، طب إزاي يا جدعان، مال "المؤخرة" بالقلب؟.



إسماعيلية رايح جاي

الغلط الكوميدي بقى اللي المفروض ماكنش ينفع يعدي على المؤلف في فيلم "إسماعيلية رايح جاي" هو إن "منعم، وإبراهيم، وسلوى"، اللي هما محمد فؤاد ومحمد هنيدي وحنان ترك، وعلى الرغم من اختلاف حروف اسمائهم الأولى إلا أنهم كانوا في لجنة واحدة.. "حكمة ربنا يا اخي اعترض بقى".




حلم العمر

حمادة هلال، في فيلم "حلم العمر" أبوه توفى وهو صغير، طيب أخته اللي هي منة عرفة، واللي الفرق بينهم كان فوق العشرين سنة، جت إمتى وإزاي.. ؟!!