الشر في رمضان.. .. مين أكتر واحد اقنعك وكرهته؟

الثلاثاء 19 يونيو 2018 16:00
كتب: ندا عصام

 رمضان السنة دي، كان فيه تنافس شديد جدا على الأدوار الشريرة، كل ممثل قدمه على طريقته الخاصة في منهم كان ظاهر على ملامحه من اول جمله وفي اللي كان مستخبي، واحنا اكتشفناه، هنفتكرهم مع بعض، وقولولنا حبيتوا مين اكتر في السكة دي؟

 

صبري فواز

صبري فواز في دراما رمضان 2018 قدم شخصية "عماد" الشرير "السيكوباتي" في مسلسل "رحيم" ببراعة شديدة جدا، وعلى الرغم من أنه قدم دور الشرير نفسه في المسلسل الكوميدي "سك على اخواتك" لكن في "رحيم" كان حاجة تانية خالص، بنظراته وطريقة كلامه المستفزة الهادئة، بصراحة اقنع الجمهور، وكرههم فيه وده يدل انه جسد الشخصية على أكمل وجه زي ما قال الكتاب.. "صبري فواز مبدع من عالم أخر".

 


طارق عبد العزيز

شخصية "سيد" من اكتر الشخصيات الشريرة اللي لفتت الأنظار في "رحيم"، تركيبة مختلفة وجديدة على طارق عبد العزيز، خصوصا أن الشر هنا قدمه بشكل خفيف الظل وده اللي ميزه عن غيره، الشر كان جواه بس مكنش باين علي ملامحه.. "برافو".


 


عمرو عبد الجليل

عمرو عبد الجليل، السنة دي كان مفاجأه كبيرة لينا الحقيقة، وده علشان الناس كلها كانت شايفاه في منطقة الكوميديا وبس، لكن المرة دي اثبت إنه غول تمثيل، وغير نظرة كثير من الجمهور من خلال شخصية "الريس حربي" اللي قدمها في مسلسل "طايع"، وهو واحد من أنجح المسلسلات اللي دخلت المنافسة، الريس حربي ماكنش فارق معاه حاجة خالص، كل غلط كان بيعمله من غير مايحس بالذنب، زي القتل والظلم وتجارة الآثار، تعبيرات عمرو عبد الجليل كانت حادة وقوية، ده غير شكله ونبرة صوته اللي الكل كان أول ما يسمعه يعرفه، عمرو بجد اثبت انه مش ممثل كوميدي بس ودلوقتي هو شوق الجمهور اكتر ومستنين منه اللي جاي.

 


روجينا

الشر بقى عند روجينا كان مختلف على الإطلاق غير اي ممثل تاني، اكيد اللي عملته ده ماكانش مكتوب على الورق وبس، ولكن هي خدت الشخصيه لعندها واضافت لها علشان تطلع بالمنظر الجبار ده، شخصية "مايا" المعجونة بالشر نجحت في أنها توصل للناس من غير اي تعب، ف الشر عندها كان صوت عالي مع رفعة حاجب و"شرشحة" تقدر تقول كوكتيل.

 


آيتن عامر

ايتن عامر، أو "سماح" في مسلسل "ايوب" كانت شريرة على حق، ونجحت في تجسيدها للشخصية والدليل على كده كم الشتايم اللي خدتها بعد كل حلقة، السوشيال ميديا اتقلبت عليها والكل كان بيتكلم عن قوتها وجبروتها، ايتن عامر ، الظاهر أنها كانت في تحدي مع نفسها، وبالفعل كسبته.



هيثم أحمد زكي

ومحدش يقدر ينسى هيثم أحمد زكي، في الجزء الثاني من "كلبش" فقدم شخصية "عاكف أبو العز" الشرير الصعيدي، ولفت الإنتباه  مش بشخصيته بس لأ ده كمان باللوك اللي ظهر به مع "تبريقة عنيه".

 


دياب

تميز دياب، بالشخصيات الشريرة في الموسم الرمضاني لهذا العام، من خلال مسلسل "أيوب" و"ضد مجهول" فكل واحدة منهما كان لها طابع خاص و"ريأكشنات" مختلفة جذبت الجمهور له.



باسل خياط


وصلنا لزعيم جمهورية الشر، صاحب الشكل المتفرد في تقديم الشرير صاحب المرض النفسي، القادر على إرهاقك والضغط على أعصابك طول الثلاثين حلقة، باسل خياط راح بأدوار الشر لمنطقة تانية خالص "بتاعته لوحده".