المحترفون المصريون في الميركاتو "الصيت ولا الغنى"

الاثنين 6 أغسطس 2018 12:47
كتب: محمد جمال

خلاص فترة الانتقالات الصيفية الحالية على أعتاب الانتهاء في معظم الدوريات الأوروبية الكبرى واللي باقي على انتهائها أيام قليلة تتعد على الأصابع.

وشهدت فترة الانتقالات العديد من الصفقات والتدعيمات لمعظم الأندية في الدوريات الأوروبية على عكس اللاعبين المصريين المحترفين اللي كان متوقع أن يكون لهم دور كبير في الميركاتو ولكن تقدر تقول كدا صومنا صومنا وفطرنا على بصلة.

تعالوا بينا نشوف الكلام كان في نهاية الموسم اللي فات وقبل كأس العالم على ايه وبقى فين دلوقتي.

 

·       محمد صلاح

 ارتبط اسم محمد صلاح في نهاية الموسم الماضي وخاصة لما قدر يوصل بفريقه لنهائي دوري أبطال أوروبا بناديي ريال مدريد وبرشلونة إلا أن الفرعون أكد استمراره مع ليفربول وجدد تعاقده براتب ضعف اللي كان بياخده.

 

·       محمد النني

كلام كتير إن النني هيمشي من أرسنال وخاصة بعد رحيل أرسين فينجر عن ملعب الإمارات وتولي الإسباني إيمري إلا أن النني ضمن البقاء في الجانرز حتى الآن.

 

·       أحمد حجازي

ارتبط اسم المدافع المصري أحمد حجازي بأندية كتير في الدوري الإنجليزي منها توتنهام ونيوكاسل وبرايتون إلا أن اللاعب استمر حتى الآن مع ويست بروميتش وهيلعب معاه بدوري الدرجة الأولى.

 

·       تريزيجيه

كان اكتر لاعب حواليه كلام عن الرحيل وخوض تجربة جديدة بعد تألقه مع فريق قاسم باشا التركي الموسم اللي فات.

وارتبط اسم تريزيجيه بالعديد من الأندية على رأسها جالطة سراي التركي وإنتر ميلان وروما الإيطاليين وإيفرتون وليستر سيتي الإنجليزيين ومارسيليا الفرنسي وسلافيا براج التشيكي والمفاجأة إن كل العروض دي مفيش حاجة فيها تمت لحد دلوقتيي وأصبح تريزيجيه قريب للبقاء مع فريقه بشكل كبير.

 

·       عمرو وردة

ارتبط أيضًا عمرو وردة بنادي طرابزون سبور التركي ولكن إدارة نادي باوك اليوناني رفضت رحيله وتمسكت باستمراره في الموسم الجديد.

 

·       رمضان صبحي

وحسم رمضان صبحي جناح أيسر منتخب مصر موقفه بدري بدري عندما رحل من نادي ستوك سيتي اللي هبط للدرجة الأولى وانتقل إلى نادي هيديرسفيلد تاون قبل انطلاق كأس العالم.