واحد فيهم رسم لحن أغنية على صدره.. حكاية "التاتو" والـ7 نجوم

الثلاثاء 10 يوليو 2018 12:06
كتب: ندا عصام

اتفق عليه الكثيرون، واختلف معه أكثر،  بس في الأخر الناس بتتعامل معاه على أنه موضة، والنجومية تحب الموضة زي ما احنا عارفين، أيوة كلامنا عن  "التاتو" أو بلغتنا العربية الجميلة الوشم، وعلى الرغم من أنه مناسب للفنانات اكتر بحكم الستايل والفساتين اللي بيلبسوها، إلا إننا شوفنا اكتر من فنان اتجه للموضة دي، وكان الوضع وقتها صدمة واستغراب للناس.

احمد الفيشاوي

يعتبر من أكثر الفنانين المهووسين بالوشم لدرجة وصلت للأدمان والجنون ، "تاتو" الفيشاوي مغرق جسمه كله بالعربي وبالإنجليزي، مش في منطقة معينة زي باقي الفنانين يعني، من أسماء زي "امي"، و"لينا" اللي هي بنته، لرسومات مختلفة أغلبها مش مفهوم معناه، الفيشاوي هو بطل العالم العربي في "التاتو" أساسا.

 

الهضبة

عمرو دياب، ومين غيره ملك الموضة، وأسطورة الفنانين العرب، الكل استغرب التاتو اللي ظهر به أول مرة، بس وشم الهضبة مش مجرد موضة لأ يوم ما رسم كتب اسم ابنه "عبدالله" على ايده بالخط العريض حتى يكون ملازمه ومعاه في كل الأوقات وبعدها لما طرح البومه "معدي الناس" اتفاجا جمهوره بوشم جديد لكن المرة دي كتب كلمة "Stamina"، واللي هي عبارة عن "القدرة على التحمل".

 



كاظم الساهر

نيجي للسر وراء إخفاء وشم القيصر، فهو اولا كان ناحية الصدر، وماحدش خد باله منه خالص الا لما هو اتكلم عنه، فهو عبارة عن نوتة موسيقية  لقصيدة "مدرسة الحب" للشاعر الراحل نزار قبّاني، واللي لحنّها في بغداد اثناء قصف الطيران للمنطقة، وكان كاظم بينام في غرفة، ويسيب النوتات الموسيقية في غرفة أخرى، لكي تبقى الألحان، في حالة موته بسبب القصف، وبعد خروجه من بغداد، قام بتسجيل الأغنية، والقيام بوضع هذا الوشم على صدره علشان يفتكر به كل حاجة حصلت.

 



وائل كافوري

الراجل يرسم على ايده ماشى على جسمه وماله مش عيب، لكن على رجليه ده اللي جديد بقى، وملفت للنظر اوي، وده اللي ظهر به وائل كافوري، على غلاف ألبومه 

 


تامر هجرس

واكيد طبعا تامر هجرس، هيدخل ضمن قائمة "التاتو"، فالوشم عنده ملفوف حوالين ذراعه وعبارة عن "لا حول ولا قوة إلا بالله"، وقتها السوشيال ميديا اتقلبت وانقسمت الآراء ولكن في الأغلب معترضين، وليس مؤيدين.

 



أحمد مكي

وأحمد مكي، ظهر هو كمان بوشم على هيئة اسورة كبيرة أعلى معصمه، وبعدها في مسلسل شوفناه بس المرة "بهزار"، بأكثر من رسمة وقت مسلسل "خلصانة بشياكة"، تخص الشخصية الكوميدية اللي قدمها.




محمد رجب

وفي فترة من الفترات اتجه محمد رجب، للوشم على ذراعه اليمين، ولكن الموضوع ماطولش معاه، وبعدها ظهر من غيره بعد إعتراض جمهوره عليه، موضحا بأن الأمر كان مجرد من أجل جلسة تصوير.