تحت شعار " انا أركب دقن".. 3 مجرمين ستايل واحد في "رحيم"

الأربعاء 30 مايو 2018 14:34
كتب: محمد عباس

فاكرين الكوميديان محمد نجم في مسرحيته التاريخية "عش المجانين" لما كان بيخطط مع ليلى علوي للتنكر وجملته الشهيرة "انا اركب دقن"، هو ده بالظبط كل اللي هتحتاجه لو عايز تطلع في دور مجرم أو بلطجي مع ياسر جلال في رمضان الجاي، ولو تابعت أول 13 حلقة بس من مسلسل "رحيم"، اللي بيحقق أعلى المشاهدات في دراما رمضان السنة دي، هتتأكد من كلامنا، ثلاث شخصيات ظهروا ليعكروا صفو حياة بطلنا "رحيم"، أكتر ما هي متعكرة أصلا، والحاجة المشتركة بينهم هما الثلاثة، إنهم "ركبوا دقن"، بس ماننساش إنهم الثلاثة "حلقوا راسهم بالموس"، وكأنه اتفاق بين صناع المسلسل إن ده هو النموذج اللي واخد موافقة الجهات المسئولة لشكل المجرم، لدرجة إن الناس إتلخبطت بين الثلاثة، اللي هنعرفكم بيهم في الكام سطر الجايين.

 

 

محمد أبو النجا "عبودة"

 

كان بطل واحد من أهم مشاهد المسلسل في الحلقة الأولى، لما اتخانق مع محمد رياض "اللي عمل فيها شبح ساعتها"، علشان يظهر ياسر جلال بعد خروجه من السجن، "عبودة" بقى صديق "رحيم" مع الحلقات، واشتغلوا مع بعض بعد كده أكثر من مرة، بعد ما "رحيم" قدر يوصل معاه لاتفاق قبل ما تتكرر الخناقة بينهم تاني.

 

 

محمد أبو النجا هو مدرب لياقة بدنية، واشتهر بتأهيل الفنانين قبل قيامهم بأعمالهم الفنية، وتجهيزهم بدنيا، قبل أن يقوم بالتمثيل في رمضان الماضي بمسلسل ظل الرئيس مع ياسر جلال، الذي استعان به في دور أكبر مع "رحيم".






هاني التابعي "خميس الونش"

 

خميس الونش البلطجي اللي بينه و بين رحيم تار قديم، واللي اتفقوا معاه "أمينة"، و"سيد"، أصدقاء "رحيم" اللي باعوه، وهو في السجن، لكن الونش بيفلت منه رحيم، علشان يحققوا معاه في الأمن الوطني ويعترف لهم باتفاقه مع سيد علشان يقتل رحيم.

 

هاني التابعي شارك قبل كده في أكثر من عمل درامي زي واحة الغروب، والحالة ج، وظل الرئيس اللي كان السبب إنه يشارك رمضان ده مع ياسر جلال من تاني في "رحيم".







سعد المختار

 

المجرم اللي شوفناه في أول حلقة في انتظار رحيم علشان يوصل له رسالة، واللي بنكتشف بعد كده إنه ورا خطف "هشام" أخو "رحيم"، وبينجح "رحيم" في قتله بعد تخليص "هشام".

 

سعد هو أشهر الوجوه الثلاثة، وده بسبب نجاحه الكبير قبل كده مع يوسف الشريف في مسلسل "القيصر"، و"كفر دلهاب"، وغير مشاركته في مسلسل "رحيم"، بيظهر في رمضان السنة دي ضمن أحداث مسلسل "أبو عمر المصري".