تعرف انت إيه عن المثل الشعبي "المتعوس متعوس ولو علقوا في رقبته فانوس"؟

الاثنين 16 يوليو 2018 16:37
كتب: ندا عصام

بنسمع كتير " المتعوس متعوس ولو علقوا في رقبته فانوس"، هو مثل شعبي شهير، بس عمرنا عرفت معناه إيه أو حكايته إيه بالتفصيل، لو حبيت تعرف عندك الحدوتة.

 الموضوع من البداية كدة بيحكي ان كان في أخين واحد فقير والتاني غني، والناس كانت بتنتقد الأخ الغني بسبب عدم مساعدة أخوه الفقير.

وفي مرة من المرات جه واحد من أصحاب الشخص الغني يقوله عن الكلام اللي الناس بتقوله عليه بسبب عدم مساعدة أخوه، فقاله إنه دايما بيحاول يساعده لكن هو بيرفض، وجرب أكتر من طريقة بأنه يساعده لكن في كل مرة بيفشل.

فصاحب الأخ الغني ماصدقش كلامه فقرر أنه يثبت له وأداله مبلغ مادي علشان يرميه في طريق أخوه "المتعوس"، لما دخل عليهم بعد كدة، توقعوا يقولهم على الفلوس، لكن في الحقيقة ماعملش كدة خالص، وقالهم أنه راهن نفسه في اليوم ده أنه يجيي مغمض العينين، فقاله صاحب أخوه "المتعوس متعوس ولو علقوا في رقبته فانوس"، ومن هنا بقى جه مثلنا الشعبي ده.