فيهم جدعان وفيهم غدارين.. 5 أغاني اتعملت للصحاب

الأحد 22 يوليو 2018 10:52
كتب: ندا عصام

 على مدار السنين اللي فاتت سمعنا وشفنا مطربين كتير غنوا عن الصحاب، وكل واحد فيهم غنى على طريقته منهم اللي حكى قصته الحقيقية مع صحابه، ومنهم اللي قدمها على حسب أحداث الفيلم، وغيرها من المواقف.

 

اجدع صحاب

"اجدع صحاب صحابي من صغري دول اللي يمشوا معايا دوغري، دول أغلى ناس هما الأساس و اقولكوا ايه".. تعتبر  "اجدع صحاب" واحدة من أشهر وأهم الأغاني اللي اتقدمت عن الصحاب، صوت سوما المميز مع اللحن كان حالة مختلفة جدًا، وفضلت الأغنية معلقة معانا لوقت طويل ولحد يومنا الحال، يعني نقدر نقول كدة مفيش حد مش حافظها.


 


أنا الصاحب

مين ينسى نجوم ستار اكاديمي مينا عطا ومحمد شاهين، لما غنوا "انا الصاحب" اغنية كسرت الدنيا وقتها، ده غير ان الفيديو كليب زاد من نجاحها اكتر، الناس حبت الأغنية جدا وكلامها كان خفيف على اللسان، اتكلمت عن الصاحب اللي بيسمع لصاحبه وبيشيل عنه همومه ويحس به من غير ما ينطق، وان الدنيا مهما جت عليه ربنا موجود يعني لازم يتفائل بالخير، وفي النهاية "يا صاحبي يا صاحبي لينا رب كبير".

 



غدر الصحاب

مطربين كتير اتكلموا عن أهمية الصحاب في حياتهم وجدعانتهم، جه بقى محمد حسن، واتكلم عن عكس كدة تماما وهو غدر الصحاب، وبالأخص صاحب عمره اللي باصصله في اللقمة، فقال في بداية اغنيته"غدر الصحاب ع الكيف اصلي والأصلي ليه مبقاش اصلي" كلام.. خالد تاج الدين ووليد سعد جابوا من الآخر.


 


الصحاب

اغنية "الصحاب" جمعت بين مطرب زاب ثروت وحمزة نمرة، وده جديد ومختلف، لان زاب مطرب راب وليه طريقته الخاصة في الأداء، غير حمزة، خالص، وحكى حمزة، في الأغنية عن ذكرياته مع صحابه ايام الطفولة والشباب ولعبهم وخناقتهم مع بعض وأوقات سفرهم ورحلاتهم.


 


أصحاب أنا وانت ولا

في فيلم "أصحاب ولا بيزنس" قدم مصطفى قمر، أغنية عن نفس الموضوع اللي بنتكلم فيه، وظهر مع طارق عبد العزيز وهاني سلامة، اللي هما صحابه في الفيلم، في دور الصحاب بجميع مواقفهم الكوميدية وغيرها، هى اغنية قديمة اه بس سابت علامة في جيل كامل.