حكايات الأمثال الشعبية "1".. "اللي مايعرفش يقول عدس"

الأحد 8 يوليو 2018 16:36
كتب: ندا عصام , محمد عباس

 الأمثال الشعبية عايشة معانا يوميًا، مفيش حد بيحصل معاه موقف إلا، ولازم يفتكر مثل شعبي مشابه للموقف اللي حصل له أو اتعرض ليه، وكل مثل الظاهر كدة أن له قصة معينة احنا مش عارفينها، يعني مثلا عمرك عرفت ليه هو "اللي ميعرفش يقول عدس"، ولا إيه هي علاقة العدس أصلا بإن الواحد فينا مايعرفش حاجة مثلا.

 

"اللي مايعرفش يقول عدس".. مثل شعبي قديم جدا حكايته كلها، بتتلخص في إن كان في رجل بقال كان يبيع في دكانه العدس والبقوليات والفول، هجم عليه فجأة لص وسرق فلوسه وجري، وفي قصة أخرى يقال إن هذا اللص ظبطه الرجل، وزوجته بتخونه معاه، فقام التاجر بالجري خلفه، واثناء جرى اللص، واستعجاله تعثر في شوال العدس، فوقع الشوال، وتبعثر كل ما فيه.

فظن الناس لما شافوا شوال العدس واقع على الأرض، والتاجر بيجري خلف اللص، إنه سرق بعض العدس وهرب، وأن التاجر يجري خلفه، ومن هنا لاموا التاجر وعاتبوا على ما فعلوه وقالوا له "كل هذا الجري من أجل شوال عدس؟! أما في قلبك رحمة ولا تسامح؟!"، فرد التاجر الرد الشهير المعروف وقال "اللي مايعرفش يقول عدس".. ودي بقى يا جماعة قصة العدس، وعلاقته بعدم المعرفة.