خلصت الحكاية.. 4 حاجات خلت الأهلي يتعاقد مع كارتيرون

الثلاثاء 12 يونيو 2018 12:37
كتب: محمد جمال

خلصت الحكاية وخلاص إحنا في أخرها وصلنا للنهاية.. أفضل مقدمة ممكن نتكلم بيها عن حسم ملف المدير الفني الجديد للنادي الأهلي اللي كان عامل صداع سواء للجماهير أو الإدارة وحتى اللاعبين في الفترة اللي فاتت من بعد ما حسام البدري قدم استقالته من تدريب الفريق بعد مباراة كمبالا سيتي الأوغندي في دوري أبطال إفريقيا.

الأهلي أعلن النهاردة تعاقده رسميًا مع المدير الفني الفرنسي باتريس كارتيرون مدرب وادي دجلة الأسبق لتولي المهمة الفنية للفريق خلفًا لحسام البدري.

وخاض الأهلي فترة مفاوضات طويلة أوي مع المدرب خلال الأيام اللي فاتت لحد ما قدر أن يتوصل معه لاتفاق على كافة بنود التعاقد.

وفي السطور اللي جاية هنقولكم ليه الأهلي فضل كارتيرون عن مدربين تانيين كتير دخلوا ضمن دائرة اهتمامات مجلس الإدارة.

 

* المقابل المادي

كان من أهم العوامل اللي رجحت كفة كارتيرون لتدريب الأهلي أنه مطلبش مقابل مادي ضخم ولكن كان في قدر استطاعة الإدارة الأمر اللي خلاه الأقرب بشكل كبير وضمن الحسابات خلال الفترة الأخيرة.

 

* الجهاز الفني المعاون

موافقة كارتيرون على العمل مع جهاز فني مصري واللي اختارته لجنة الكرة والمكون من محمد يوسف مدرب عام وقائم بأعمال مدير الكرة وسامي قمصان مدرب مساعد كان من ضمن أعوامل المهمة في لتعاقد معه خصوصًا أن في مدربين كتير رفضوا تقبل فكرة اختيار الجهاز المعاون من الإدارة.

 

* الخبرة الإفريقية والمصرية

يمتلك كارتيرون خبرة كبيرة في الكرة الإفريقية حيث قام من قبل بتدريب فريق مازيمبي الكونغولي بل وتوج معه بلقب دوري أبطال إفريقيا.

مش كدا وبس لا كمان عنده خبر كبيرة في الكرة المصرية بعد ما درب وادي دجلة خلال المواسم الماضية وقدر أنه يحقق الفوز على الأهلي وكمان على دراية كبيرة بالتعامل مع الأندية المصرية.

 

* صغر السن

كمان من ضمن العوامل اللي كانت في صالح المدرب الجديد للأهلي هو صغر سنه حيث يبلغ من العمر 48 عامًا وهو ما يجعله قريبًا من عقلية اللاعبين بشكل كبير.