5 مسلسلات تشوفهم لو"ملكش" في المصري..

الاثنين 28 مايو 2018 10:05
كتب: Amira

رمضان طبعا مشهور "بإسهال" الدراما والإعلانات، فأول ما يقرب شهر رمضان بتبتدي هيستيريا المسلسلات من حيث العدد والصرف على الإنتاج، في فنانين بينزلوا "باكدج" رمضاني كده مع الياميش زى عادل إمام ويسرا وغادة عبد الرازق ونيللي كريم، وفي ممثلين بيجربوا حظوظهم في البطولة في رمضان، واحنا اللي بندفع تمن التجربة غالبا، كاميرات متشقلبة وتصوير سينمائي ومحمد رمضان بيضرب كل الناس ومسلسلات في الكومباوندز ومسلسلات في الحارة وحاجة أخر "منجهة"، عامة لمحبي الدراما المصرية فده شهر الخير، ومش هتزهق خالص وكل سنة وانت طيب وألف ألف مبروك، اما إن كنت مالكش في الدراما المصرية ماتقلقش "نيتفلكس والتورينتس" في ضهرك وبتدعمك.

نتفرج على ايه بقى..؟!


ويست وورلد "Westworld"


المسلسل بيحكي عن عالم فيه كل حاجة ممكنة، مصنوع لأصحاب الفلوس يجربوا فيه كل اللي يخطر على بالهم من غير أى عواقب، وكل حاجة في العالم ده معمولة مخصوص ليهم، لكن الحرام مابيدومش، والعالم ده بيجيله يوم ويتقلب فوق دماغهم يابو السلاطين.


اللي شاف الجزء الأول نقوله مبروك الجزء التاني بيتم عرضه حاليا، ممكن تستنى لأخر السيزون وتتفرج عليه مرة واحدة أو تسلي صيامك بحلقة كل اسبوع، وده أحسن لأن الحلقات تقيلة، والنط ما بين أزمنة كتير في الحلقة الواحدة بيخليك ممكن تشوف الحلقة أكتر من مرة علشان تتأكد انك فهمت كل التفاصيل صح، واللي مشافش الجزء الأول فرمضان فرصتك، واتفرج على ضمانتنا.


ملحوظة: المسلسل ده ماينفعش وقت الفطار ولا ساعة الهضم، ده عايز تركيز عالي جدا وإلا مش هتفهم أى حاجة خالص.


هاند ميدز تيل "The Handmaid's Tale"


جرعة مكثفة من السواد لكن من أحلي المسلسلات اللي اتعملت مؤخرا، وأخد جوايز كتير جدا، نزل منه أول جزء والتاني بيتعرض دلوقتي.


المسلسل بيحكي عن بلد بيسيطر عليها فجأة متعصبين بيستولوا عليها تماما وبيتعاملوا مع الستات على انهم ملكية خاصة، وزيهم زى الكرسي شئ بتستعمله لاحتياجك الشخصي فقط، المسلسل فيه جرعة زيادة من القهر والكآبة وفي الجزء التاني بنشوف نتيجة محاولة هروب البطلة من الجحيم ده، هل هتنجح ويبقى لابد من يوم معلوم تترد فيه المظالم ولا هنكمل سواد زى ما احنا؟!


عامة بلاش تتفرج عليه قبل ماتنام على طول، وممكن بعد الحلقة تفتح مثلا "عزمي وأشجان" علشان تهدى بس وتنام كويس.


أى تي كراود "The IT Crowd"


وعلشان يعني اللي مش بيحب المسلسلات التقيلة، فده مسلسل كوميدي وخفيف جدا، المسلسل مش جديد خالص، وفيه منه خمس أجزاء ولطيف ساعة الفطار للروقان كده ومش محتاج تركيز فتقدر تدي تركيز أكتر للأكل عادي.


المسلسل عن موظفين تقنيين "مهزئين" جدا في شركة كبيرة وبيتعرضوا طول الوقت لمواقف مضحكة جدا.


البيكي بلايندرز "Peaky Blinders"


ده بقى العظمة كلها معمول بحرفية شديدة، كادرات وموسيقى وسيناريو وتمثيل قمة في الحلاوة، المسلسل في 1919 بعد كارثة الحرب العالمية وبيحكي قصة حقيقية عن الصراع من أجل البقاء بعد الحرب بين الجنود اللي راجعين منها والعصابات اللي كانت مسيطرة جدا وقتها، الحكاية تحديدا عن عصابة البيكي بلايندرز اللي كان بيقودها جندي راجع من الحرب.


نزل منه أربع أجزاء، وفي بشرى سارة ان الخامس نازل السنة اللي جاية.


ألتيرد كاربون "Altered Carbon"


ما بلاش نتكلم في الماضي، ويالا نروح لأكتر من 300 سنة في المستقبل! المسلسل في سكة التكنولوجيا اللي هتاكلنا يوما ما بس بصياعة شوية، بيحكي عن وقت ما في المستقبل "أوي جدا خالص"، هيبقى في تكنولوجيا تنقل ذكرياتك وكل حاجة في روحك من جسم لجسم فانت بتكمل عادي لكن في أجسام تانية، يعني مش هتموت لكن ممكن تصحى في جسم محمد رمضان مثلا وطبعا موضوع  النقل من جسم لجسم ده يعتمد على معاك فلوس قد ايه ولو معكش بيتخزن عقلك في مكان ما لحد ما يا إما ترجع يا تفضل في الولا حاجة، راجل ثري وصاحب نفوذ في المسلسل بيصحى محارب قديم "مات في خناقات مترتبة على ثورة ضد العالم الجديد" متخزن بقاله سنين وبيوعده بفرصة يرجع يعيش تاني لو حل لغز جريمة قتل.


نتمنى لكم مشاهدة ممتعة!