"ديو" المطربين.. رحلة من "ليه يا دنيا" ولحد "الكيف"

السبت 7 يوليو 2018 12:25
كتب: محمد عباس

على الرغم من الديو اللي بيكون بين مطربين رجالة موجود من زمان الا ان الدويتو المنتشر والمعروف عندنا اكتر بيبقى "خلطة" بين مطرب ومطربة، علشان يكون مزيج مختلف بين صوت نسائي ورجالي في نفس الوقت، وفي الفترة الأخيرة لاحظنا عكس كدة واتفرجنا وسمعنا دويتوهات بين رجالة فقط، اغاني لفتت الانتباه وحققت نجاح كبير بين المع المطربين. 

 

وعلى سبيل المثال مانقدرش تنسى اغنية "ليه يا دنيا الواحد" بين محمد منير وخالد عجاج، موسيقتها وكلماتها وحركات الكينج وطريقة عجاج كانت حالة مميزة، كليب عدى عليه فترة كبيرة لكن لحد دلوقتي فاكرينه ومسمع معانا. 



احمد عدوية وابنه

عن جمال النجم احمد عدوية وابنه محمد، لما قدموا لينا ديو "المولد"، الموال اللي في بداية الأغنية بصوت عمنا أحمد عدوية، كان حدث ساعتها وده مش جديد عليهم، مع دخلة محمد ونبرة وبحة صوته اللي مش موجودة عند حد، كان فعلاً عمل مكتمل النجاح وياريت يتكرر تاني "بصوت عشاق عائلة عدوية"



 العسيلي والليثي

خلق كل من الليثي والعسيلي حالة مختلفه بين جمهورهم لما قدموا لينا اغنية "خاينة"، فهي واحدة من أهم الاغاني اللي انتشرت وحققت تفاعل كبير من الجمهور الفترة الأخيرة، الحقيقة مختلفة تماما عن أي ديو أتقدم تاني، وعلى الرغم من أن كل واحد له خامة صوت معينة، الا ان مزج صوتهم في الأغنية دي وصل للجمهور بشكل سريع جدا، و الكليب زاد من نجاحه اكتر. 



كايروكى وطارق الشيخ

صوتين مايشبهوش بعض خالص كل واحد فيهم ليه استايل معين في نوعية اغانيه، خصوصا أن طارق الشيخ متميز ومشهور باللون الشعبي، وكايروكي من أهم فرق الاندرجراوند اللي ليهم اغاني مختلفة من حيث الكلمات وطريقة الأداء يعشقها جمهورهم ، لكن الحقيقة الاثنين نجحوا في تقديم اغنية "الكيف" التي مازالت حتى الآن متربعة في قلوبنا لدرجة ان اول ما تسمعها تلقائيا ترددها وترقص عليها.



الكينج والهضبة

محمد منير وعمرو دياب، نقدر نقول كده عندنا يجتمع العباقرة، تعتبر اغنية" القاهرة" اللي قدموها الاثنان حالة خاصة ولوحدها، حاجة كدة مبهجة رسمت البهجة على وشوش ناس كتير، فيعتبر برضه من الديوهات الناجحة اللي تعلق بها الجمهور.



عدوية ورامي عياش

أغنية "الناس الرايقة" واحدة من الدويتو هات اللي فعلا ماتتنسيش، مهما عدي عليها سنين وسنين، الأغنية دي اول ما نزلت كسرت الدنيا، صوت نجم الاغنية الشعبية أحمد عدويه، مع رامي عياش خلق روح جميلة، مين ينسى "وبحب الناس الرايقة اللي بتضحك على طول اما العالم المتضايقة أنا لأ ماليش في دول".