ذهب الليل والأرنب والثعلب المكار.. 4 حواديت أطفال في مونديال روسيا

الأحد 8 يوليو 2018 15:50
كتب: محمد جمال

فاكرين الحواديت بتاعت زمان اللي كنا بناخدها في المدارس الابتدائي زمان كان حاجات لطيفة وقصص قصيرة كنا بنخرج منها بعبرة مهمة في حياتنا.

تقريبًا كأس العالم 2018 السنة دي اللي في روسيا فكرنا بمعظم الحكايات اللي كنا بناخدها في الابتدائي تعالوا بينا نشوف وجه الشبه بين الحكايات بتاعت زمان ومواقف حصلت في كأس العالم.

 

·       الغريق الكداب

كان زمان في قصة إن في ولد بيمثل أنه بيغرق في البحر وينادي على الناس لإنقاذه فلما الناس تروح تنقذه يكتشفوا أنه كداب وأنه مش بيغرق.

وفي مرة من المرات كان الولد بيغرق بجد وفضل ينادي على الناس لإنقاذه إلا إن الناس لم تصدقه هذه المرة.

نفس الشيء دا اتعمل مع نيمار اللي فضل يمثل طوال الماتشات أنه بيضرب علشان يتحسبله ضربة حرة أو لاعب ياخد إنذار ولما فعلًا انضرب وكان له كرة ممكن تتحسب ضربة جزاء في مباراة البرازيل وبلجيكا اللي خسرها 2-1 لم يحتسبها الحكم ظنًا منه أنه يمثل كالعادة.

 

·       الأرنب والسلحفاة

كان في زمان حكاية بتحكي أن في أرنب وسلحفاة قرروا يخوضوا سباق سرعة وحددوا مكان لنهاية السباق.

طبعًا الأرنب كان واثق من الفوز لانه أسرع بكتير من السلحفاة البطيئة وبالفعل سق الأرنب السلحفاة بمسافة طويلة وقبل خط النهاية بأمتار بسيطة الغرور سيطر على الأرنب وقرر أنه يرتاح شوية وأنه متأكد من الفوز

ولما قعد الأرنب عشان يرتاح نام فترة طويلة وقدرت السلحفاة اللي مفقدتش الأمل وواصلت السبق لحد ما قدرت تكسب السبق لأن الأرنب نام ومعداش خط النهاية.

نفس السيناريو دا تقريبًا كان في مجموعة كرواتيا والأرجنتين خاصة بعدما تباهت الصحف الأرجنتينية بليونيل ميسي وأنهم متأكدون من التأهل حتى كادت أن تودع البطولة مبكرًا لولا الحظ الذي منحهم التأهل ولكن في المركز الثاني خلف كرواتيا التي مثلت دور السلحفاة التي ركزت في مشوارها فقط والإصرار على التأهل حتى وصلت لدور نصف النهائي في الوقت نفسه ودع منتخب الأرجنتين البطولة بعد خسارة مذلة أمام فرنسا.

 

·       الثعلب المكار يقف خلف الدار

فاكرين حكاية الثعلب المكار الذي يقف خلف الدار وانتظر خروج صاحب المزرعة من أجل الدخول لأكل الطيور بعد رحيله.

هو نفس القصة التي جسدها المنتخب الإنجليزي في مونديال روسيا حيث تعمد الخسارة أمام بلجيكا بهدف بعد المشاركة بالدكة بعد ضمان التأهل لدور الـ16 والتواجد في الجانب السهل من المواجهات بعيدًا عن فرنسا والبرازيل.

وتواجد منتخب إنجلترا في مواجهة كولومبيا وكرواتيا وهم أسهل بكثير من الجانب الآخر الناري فكان مكر إنجلترا في صالحها وهو ما ساعدها في التأهل لنصف نهائي البطولة.

 

·       ذهب الليل وطلع الفجر

طبعًا كلنا عارفين أغنية ذهب الليل وطلع الفجر والعصفور صوصو اللي كانت شيء أساسي في طفولتنا ويمكن لسة موجودة لحد دلوقتي بس مش كتير لأن الأجيال اللي موجودة حاليًا متطورة عننا كتير.

المهم إن الأغنية دي جسدت أيضًا منتخب في المونديال وهو منتخب ألمانيا اللي قام بدور العصفور الصغير اللي كل الناس حذرته من لعنة المنتخبات المتوجة بالبطولة إنها بتخرج بدري وانتقدته بعد قرار استبعاد ساني إلا إنه مسمعش كلام حد وتباهى بمنتخب الماكينات لحد ما اتخربش وخرج من دور المجموعات في مونديال هو الأسوأ في تاريخ ألمانيا.