العمدة و الجزمة و الرز المستوي.. 10إبداعات من شلبوكا في ماتش بلجيكا

الخميس 7 يونيو 2018 16:10
كتب: ندا عصام

 

تلقى منتخب مصر هزيمة ثقيلة في أخر مبارياته الودية قبل إنطلاق منافسات كأس العالم في روسيا الأسبوع القادم، مباراة شهدت الكثير من التفاصيل الفنية، واللقطات التي شغلت رواد مواقع التواصل الإجتماعي من الجمهور المصري، ولكن كان أبرزها هي إبداعات المعلق مدحت شلبي، والذي قدم كعادته تعليقاته التي انقسم حولها الأراء، ما بين اعتبارها خفيفة الظل، وما بين وصفها بالإستفزاز، واحنا قررنا نعرض لكم أهم عشر تعليقات قالها المعلق المخضرم مدحت شلبي في مباراة بلجيكا الودية، والحكم لكم.

 

- بدأ شلبي "إيفيهاته" في تعليقه على المهاجم البلجيكي الضخم لوكاكو عندما قال "ده ديزل، وتاخده درجة أولى، درجة تانية، درجة تالتة، التلاتة شغالين، دماغه شغالة يمينه شغالة شماله شغالة، بقولكم ديزل".



- ومع كل لمسة من اللاعب فيتسل يؤكد لنا شلبي أنه لاعب قصير "إنما وتد"، ولكن معلومة عزيزي القاريء، فيتسل طوله يبلغ 186 سم.


- ومع تألق محمد عبد الشافي الظهير الأيسر لمنتخب مصر: "عبد الشافي حاجة حلوة اوي النهاردة، حاجة مستوية أوي، زي الرز المفلفل، تاكله كده الواحدة بواحدة".



- بعد تدخل لاعب بلجيكا على عمرو وردة: "خليك يابني شوية في الأرض، خليه ياخد إنذار، بس هنقول إيه، وردة راجل مؤدب ومحترم".


- بعد خطأ أحمد فتحي في الهدف الثاني: "ما انت كنت ماشي في العدل يا فتحي، تاخد مخالفة ليه، تمشي عكسي ليه يا اخي".

 

- بعد تسديد طارق حامد لإحدى الكرات بشكل سيء: "يا راجل يا طارق، يا راجل إحنا مش في فرح العمدة".



-في لقطة نجح فيها أحمد فتحي في قطع كرة من دي بروين: "سبعتنا فتحي مع سبعتهم دي بروين لكن سبعتنا المرة دي تكسب، موعود معايا بالعذاب يا فتحي كل سبعاتك تقيلة، رونالدو مرة، اتسو بتاع غانا مرة، ودلوقتي دي بروين".



- وكرد فعل  لتسديد كيفين دي بروين نجم وسط مانشستر سيتي الإنجليزي للعديد من الكرات أعلى المرمي: "جزمة كيفين دي بروين شكلها واسعة شوية، ودلوقتي مارتينيز هيقوله اربط الرباط شوية، اقفل الجزمة شوية".

 

- بعد ظهور الظهير الأيمن لباريس سان جيرمان الفرنسي وهو يضع الثلج على قدمه المصابة قال شلبي: "توماس مونييه حاطط رجله في التلج، احنا مالناش دعوة".

 

- بعد تدخل سام مرسي في كرة مشتركة: "يابني لعب عالكورة، يا ناس لعب على الكورة، هيقولك قانون التحكيم مادة 9 فصل 3، ده كله أي كلام، بقولك لعب على الكورة".