رغم صفر المونديال.. 5 استفادوا من وجود مصر في كأس العالم

الثلاثاء 26 يونيو 2018 11:46
كتب: محمد جمال

خلاص مشوار مصر انتهى في كأس العالم ورجنا بصفر كبييييير من روسيا بعد ما خسرنا 3 مباريات في دور المجموعات بدأناها بأوروجواي 1-0 وبعدين 3-1 من روسيا وأخيرًا 2-1 من السعودية.

وبعد مصر كلها ما كانت متفائلة بتواجد المنتخب في المونديال وأنه يقدر يصعد على الأقل لدور الـ16 من كأس العالم خاصة وأننا في مجموعة سهلة إلا أن كل الأحلام اتكسرت وضاعت وسط أداء هزيل من لاعبي الفراعنة.

وعلى الرغم من كل دا إلا أن في بعض الناس اللي استفادوا من وصول مصر لكأس العالم ومنهم.

 

·       عصام الحضري

من أهم المستفيدين من تواجد منتخب مصر في كأس العالم عصام الحضري واللي قدر يكتب تاريخ شخصي لنفسه بمشاركته أمام السعودية حتى أصبح أكبر لاعب يشارك في تاريخ كأس العالم عن عمر تجاوز 45 سنة.

والحضري ضمن المشاركة في كأس العالم بعد ما المنتخب اتأكد خروجه من الجولة الثانية وأهو على رأس المثل "مصائب قوم عند قوم فوائد".

 

·       الفنانين

بعد ما الشركة الراعية للمنتخب قررت انها تدعم المنتخب ببعض الجماهير في روسيا ووقع الاختيار على عدد من الفنانين للسفر هناك وكانت فسحة ببلاش مخسروش فيها حاجة كل على حساب الشعب وأهو على رأي المثل "أبو بلاش كتر منه".

 

·       أصجاب القهاوي

من أكتر الناس اللي استفادت من وجود نصر فقي كأس العالم خاصة وان القهاوي بتشهد إقبال كبير من الجماهير لمتابعة المباريات وخاصة مصر وكان أصحاب القهاوي يستغلوا الفرصة ويعلوا أسعار المشاريب لأنه بالنسبة ليهم موسم.

وطبعًا كانوا يتمنوا مشاركة مصر لفترة أطول في المونديال عشان الاستفادة تكون أكبر وأهو على رأي المثل "الطمع قل ما جمع".

 

·       مبرمجو الدش

من الناس اللي حققت استفادة كبيرة من وجود مصر في كأس العالم مبرمجي الدش خاصة وأن في قنوات على الأقمار الصناعية الأوروبية كانت بتنقل مباريات كأس العالم.

ولجأ كتير من الشعب المصري للمبرمجين دول لمشاهدة المباريات في بيوتهم وحتى لو بتعليق أجنبي المهم الفرجة تكون ببلاش.

 

·       المحللين

من الناس اللي حققت استفادة من وجود مصر في كأس العالم بس مش كبيرة أوي هما كدا كدا طول الموسم بيستفادوا بظهورهم في البرامج وشهرين الصيف دول كانوا بيبقوا أجازة بس مع وجود كأس العالم ومشاركة مصر في المونديال قطاع كبير منهم انضم لبرامج رياضية لتحليل أداء المنتخب الوطني والمنتخبات التانية خلال فترة كأس العالم وأهو على رأي المثل "البحر يحب الزيادة"