شكله هيعملها ولا إيه.. الإنتر يحارب لنقل كلاسيكو الأرض لإيطاليا

الثلاثاء 24 يوليو 2018 12:45
كتب: محمد جمال

الأيام اللي فاتت كنت بسأل نفسي كتير يا ترى كلاسيكو الأرض هيبقى شكله إزاي بعد ما فقد ضلع من أهم أضلاعه برحيل رونالدو إلى يوفنتوس الإيطالي.

طبعًا الكلاسيكو سيظل قائم بين ريال مدريد وبرشلونة أمد الدهر ومش رحيل لاعب اللي هيقلل أهميته أو مشاهدته لأن الفريقين زي ما بنقول كدا بمن حضر ومش هيقفوا على لاعب ولو كان أحسن لاعب في العالم بس صدقني الإثارة فيه هتقل خاصة وإن كل الجماهير دايمًا بتقارن بين رونالدو وميسي في المستوى العادي فما بالك بقى لما بتجمعهم مباراة واحدة ويكون فيها منافسة وعشاق كل لاعب منتظرين منه هدف أو أسيست أو ترقيصة حلوة وخاصة لو للتاني.

المهم خلاص رونالدو مشي والناس بدأت تقول إن الكلاسيكو خلاص هيبقى سهل على برشلونة خاصة وإنه ما زال يمتلك نجمه الأفضل الارجنتيني ليونيل ميسي عكس الريال اللي فرط في رونالدو وكمان مدربه زيدان بسهولة.

النهاردة الصبح صحينا على مفاجأة جديدة من صحف إيطاليا اللي أكدت إن الإنتر ميلان دخل في مفاوضات جادة مع ميسي للحصول على خدماته والرد على اليوفي بصفقة من نفس العيار.

الإنتر مستعد يدفع ملايين الملايين عشان يحصل على خدمات ميسي وهو متأكد إنه هيقدر يعوض الفلوس دي مش في البطولات بس كفاية نسبة بيع التيشيرت الجديد لليو وخاصة إن له عشاق في كل أنحاء العالم.

الإنتر لو قدر يخطف ميسي هيكون سبب في مولد كلاسيكو أرض جديد غير برشلونة والريال وهيكون بين اليوفي والإنتر.

نجاح الإنتر في الصفقة هيرجع بشكل كبير أهمية الدوري الإيطالي خاصة وأنه هيكون بيضم لاعبين سيطروا على الكرة الذهبية في آخر 10 سنين.

في نفس الوقت نابولي مش ساكت فبعد تولي أنشيلوتي القيادة الفنية للفريق وهو دخل في مفاوضات كبيرة مع أكثر من لاعب مميز منهم لاعبين في الريال وسبق ليهم ارتداء الملكي زي كريم بنزيما ودي ماريا وغيرهم من النجوم.

الأيام القليلة اللي جاية لو الإنتر قدر يفوز بتوقيع ميسي هتكون نقلة جديدة في كرة القدم الإيطالية لأنها هتقدر تجذب أنظار عشاق ميسي ورونالدو للدوري والاهتمام بالمباريات وهتعيد النظر في ترتيب الدوري الإيطالي بين الدوريات الكبرى.