شنب مين يكسب؟!.. ستايل "باشا مصر" موضة رمضان 2018

الأحد 3 يونيو 2018 12:24
كتب: ندا عصام

في الدراما الرمضانية لهذا العام شاهدنا اكتر من فنان بنفس "اللوك"، طبعا كله طبقا للشخصية اللي بيقدمها في المسلسل، واللوك اللي بنتكلم عليه، عبارة عن شنب بس من غير دقن، في منهم شخصيته كوميدية وأخرى صعيدية جادة وغيرها، في تجربة جادة لإحياء أسطورة "سليم الأنصاري" اللي كسرت الدنيا رمضان اللي فات، ف يا ترى شنب مين يكسب في رمضان؟


أمير كرارة

الناس كلها ارتبطت بشخصية أمير كرارة في "كلبش" الجزء الأول، وعلشان كده شوفنا الجزء الثاني اللي بيتعرض دلوقتي في رمضان، ولوك سليم الأنصاري، كان جزء من نجاح الشخصية، وخاصة شنبه اللي كان سبب في إن نص شباب مصر تقلدوا .. وواضح كدة إن شنب سليم الأنصاري زي ما بيتر ميمي مخرج العمل دايما بيقول "سيغزو العالم".

 



محمد رمضان

شنب محمد رمضان، في مسلسل "نسر الصعيد" السنة دى مختلفش كتير عن شنب كرارة، والظاهر ان الموضة شنب من غير دقن، بس بصراحة اللوك لايق مع شخصية "زين القناوي" الصعيدية، وكل سنة اتعود محمد رمضان، على ابتكار لوك جديد يتناسب مع الشخصية اللي بيقدمها، من دقن الأسطورة للشنب على الجلابية محاولا الوصول دائما إلى "رقم واحد، وثقة في الله نجاح".

 



على ربيع

على ربيع، خد الشنب لحتة تانية خالص بقى، شخصية سعادة في "سك على اخواتك"، صعيدية كوميدية ، وشخصيته مرتبطة برضه بشنبه "صعيدي بقى"، بس مجرد ما تبص لشكله تلقائيا لازم تموت من الضحك زي ما كتير على السوشيال ميديا ما بيقولوا.




بيومي فؤاد

بيومي فؤاد، طالع برضوا في مسلسل "خفة يد" بنفس الاستايل اللي هو "شنب بس"، وبيقدم فيه شخصية ضابط شرطة، ولكن بطريقة كوميدية كعادته، "ماهو مش أمير كرارة يعني".




عمرو يوسف

عى الرغم من أن عمرو يوسف، حلم فتيات كتير نظرًا لوسامته وعينيه الملونة، بس المرة دي اختار أن يكون شخصية جادة وإيه صعيدية، واتبع "يوسف" استايل "الشنب" كي تتلائم مع شخصيته في المسلسل اللي حقق نجاح كبير لحد دلوقتي "طايع".