صفقات ريال مدريد الصيفية "سراب ووهم"

الخميس 9 أغسطس 2018 11:36
كتب: محمد جمال

وهم في وهم البداية المثالية اللي ممكن تقولها عن الميركاتو الصيفي السنادي لريال مدريد الإسباني.

ريال مدريد اللي عودنا السنين اللي فاتت على ضم صفقات من العيار التقيل كل موسم السنة دي حاجة مختلفة تمامًا وكأنه شبع بطولات ومش عاوز يكسب تاني.

من أضعف فترات الانتقال اللي عملها ريال مدريد في تاريخه كانت السنة دي أو لحد دلوقتي على الأقل لأن لسة في أيام قليلة باقية ممكن يقدر فيها أنه يعزز صفوفه.

ياريت الريال معملش صفقات وبس لا دا كمان خسر أهم لاعبيه وهو البرتغالي كريستيانو رونالدو اللي طلب الرحيل لليوفنتوس الإيطالي وكمان كوفاسيتش اللي اتنقل لتشيلسي وفي كلام كمان عن رحيل مودريتش بشكل كبير لإنتر ميلان.

الريال بس قدر يعمل صفقة واحدة كبيرة خلال فترة الانتقالات الصيفية لحد دلوقتي بعد ما قدر يخطف كورتوا حارس مرمى تشيلسي بصعوبة في الساعات الأخيرة أما باقي الصفقات فكانت ضم ألفارو أودريوزولا وفينيسيوس جونيور.

وعلى الرغم إن الريال يمتلك حارس مرمى مميز بحجم نافاس إلا أنه صمم على تعزيز المركز دا بكورتوا لأنهم شايفينه مستقبل النادي.

تعالو بينا بقى نشوف الصفقات اللي ارتبطت باسم ريال مدريد السنة دي وكلها طلعت في الآخر سراب أو على الأقل لحد دلوقتي

 

·       هازارد

كلام كتير جدًا من الميركاتو الشتوي اللي فات إن ريال مدريد بيفاوض هازارد وأن اللاعب قاب قوسين أو أدنى من الفريق الملكي وأن هازارد هو هيكون خليفة رونالدو مع الريال.

كل الكلام دا اتقال في الصحف الإسبانية في الشهور الأخيرة ولكن حتى وقتنا هذا لم يفلح الريال في ضم هازارد على الرغم إن اللاعب موافق ولكن إدارة تشيلسي رافضة الأمر.

 

·       نيمار دا سيلفا

بعد انتقال نيمار من برشلونة لباريس سان جيرمان الموسم الماضي طلع كلام كتير إن ريال مدريد له دخل في الصفقة وأن رحيل نيمار للدوري الفرنسي مجرد كوبري بس عشان يرجع منه لريال مدريد.

ولكن الظاهر كدا أن كل دي طلعت إشاعات مغرضة لأن باريس أكد إن نيمار مش للبيع وأنه مكما مع الفريق الفترة اللي جاية.

 

·       هاري كين

من فترة طويلة وريال مدريد بيتمنى خطف هاري كين بأي شكل من توتنهام.

الريال شايف إن هاري كين هو المهاجم المثالي دلوقتي في العالم وأنه هيكون إضافة كبيرة له وأنه هيحاول ضمه من فريقه إلا أنه لحد الآن مفيش أي جديد عن هاري كين.

 

·       ليفاندوفيسكي

بصراحة أنا خلاص فقدت الأمل إن ليفاندوفيسكي ممكن يلعب لريال مدريد لان كل سنة تقريبًا ومع كل فترة انتقالات نسمع إن ريال مدريد بيفاوض المهاجم البولندي ليفاندوفيسكي وبيخطط لخطفه من البايرن "الظاهر كدا إم مفيش أي خطة نافعة لخطفه".

 

·       محمد صلاح

ارتبط أيضًا اسم محمد صلاح نجم منتخب مصر بالانتقال لريال مدريد في فترة من الفترات وخاصة بعد تألقه الموسم اللي فات مع  ليفربول.

الصحافة الإسبانية قالت إن صلاح هيكون بديل جاريث بيل في الريال الموسم الجديد لأن بيل كل شوية بيتصاب لكن في النهاية بيل كمل وصلاح جدد عقده مع ليفربول.