مش نجومية غادة وبس.. حاجات تخليك تتفرج على "ضد مجهول"

الأربعاء 6 يونيو 2018 11:42
كتب: ندا عصام

 "ضد مجهول" أعاد غادة عبد الرازق، لجمهورها بقوة، وبشكل جديد، مسلسل مختلف يستحق الدخول في المنافسة الرمضانية الشرسة لهذا العام، بصراحة ورق حلو جدًا المعتمد على الإثارة والتشويق، وأدوار "متفصلة" على الأبطال ده غير الإخراج، وعوامل كتير كانت سبب في جذب المشاهد ومتابعته حلقة ورا الأخرى، المسلسل يناقش قضية مهمة تتناسب مع كل بيت مصري، وهي "الإغتصاب"، وفي الحالة دي قررنا نقولكم ليه المسلسل ده نجح.

 

غادة عبد الرازق "غول تمثيل"

غادة عبد الرازق ممثلة موهوبة جدًا دايما بتحب التجديد والتنوع في نوعية أعمالها وأدوارها كمان، وفعلًا بتلاقيها في حتة لوحدها، والسنة دي بتقدم في "ضد مجهول" شخصية مهندسة الديكور "ندي"، وهي مختلفة تمامًا عما قدمته من قبل من حيث الشكل والمضمون، فالشكل ظهرت بشعر قصير وتخلت عن الطويل مع ارتدائها النضارة لتكون مناسبة أكتر مع شخصيتها، أما بالنسبة للأداء فغادة في المسلسل ده اختلف ادائها تمامًا وتتطور بشكل ملحوظ جدًا، ومحدش يقدر ينسى ملامحها، ورد فعلها عندما اغتصبت وقتلت ابنتها مما جعلها تتصدر المشهد والسوشيال ميديا بتتكلم عنها براعتها في الأداء، في النهاية غادة بتتفوق على نفسها في المسلسل ده، "اتفرج على ضمانتنا".



روجينا "الشر كما يجب أن يكون"

تعتبر روجينا، عامل مهم جدًا في نجاح مسلسل "ضد مجهول" لان شخصية "مايا القوادة" اللي بتقدمها حاجة كدة كوكتيل، شر وغل وحقد مع نبرة صوت عالية وشرشحة و"ريأكشنات" ملهاش حل، روجينا الحقيقة فاجأت الجمهور بدورها، فاتضح إنها تملك قدرات تمثيلية جبارة، وده بكلام كل الناس من جمهور لنقاد لفنانين كبار اللي لحظوا تطورها وبراعتها، وأكدوا أنها تبدع في كل شخصية، وبالأخص هذه النوعية من الأدوار، والظاهر أنها كانت في تحدي مع نفسها والحقيقة "كسبت التحدي".

 


حنان مطاوع "ممثلة بدرجة شبح"

شخصية "دنيا عبد الحق" اللي بتقدمها حنان مطاوع، فيها تفاصيل كتير أوي، تقدر تقول كدة أداء تلقائي بدون "أفورة"، في مشاهد تلاقيها بتضحك بصوت عالي، ولحظة تانية تلاقيها منفعلة، ومتنرفزة وأوقات تانية هادية والدموع في عينيها، لكن في كل مرة بتقدر توصلك مشاعرها وإحساسها، وقت ظهور "دنيا" بدأت السوشيال ميديا تتكلم عنها معتقدين إنها شبح البطلة غادة عبد الرازق "ندى" بسبب تعبيراتها المريبة فهي لغز صعب حله .. ولحد دلوقتي مش عارفين هي إيه بالظبط ؟!

 


دياب "السهل الممتنع"

دياب، أول ما دخل مجال التمثيل وهو الصراحة تتقال نجح بشكل ملفت للنظر، وفي كل دور بيقدمه تلاقيه بيضيف للشخصية، وفي "ضد مجهول" بقى السنة دي أبهر الجمهور بأدائه فشخصية "حمدي" اللي بيبص للأغنياء بحقد وغل لأنه شاب فاشل لا يملك قوت يومه، وفشل حتى في مهنة سائق الدليفري، هي جديدة وعلمت مع الناس من أول الحلقات، فدايما دياب بيختار الأدوار المثيرة للجدل، وعلى الرغم من أنه في الأساس مغني لكن اثبت أنه ممثل برضه وتقيل.



محمد جمعة "عبقري في الطريق"

محمد جمعة، حالة تمثيلية مختلفة في كل مرة بيثبت أنه ممثل يجيد تقديم جميع الأدوار ولكن على طريقته الخاصة، في مسلسل "ضد مجهول" بيقدم شخصية "جمال" المحامي الانتهازي الذي يستخدم كل الأساليب الغير مشروعة، وفي نفس الوقت بيتمتع بخفة ظل، واشتهر "جمال" في المسلسل بطريقة مشيته اللي لفتت الانتباه، وفي الحقيقة محمد جمعة "بطل في دوره".