5 "أقلام" على وش الرجالة.. الست المصرية لما تجيب حقها

الأحد 8 يوليو 2018 11:41
كتب: ندا عصام

"الراجل المصري معروف بقوته، وجبروته" دي جمله قالها محمد هنيدي، في فيلم "فول الصين العظيم".. وفي مجتمعنا "الشرقي" بطبعه كان طبيعي نشوف في أفلام مصرية، راجل بيضرب ست "بالقلم"، لما يكتشف خيانتها، لما يمارس ضدها تسلطه، ويقهرها مثلا، لكن السينما المصرية خدت حق الست، وخليتنا نشوف ان ممكن الست كمان ترد "القلم" للراجل، في مشاهد كثير مننا مش هينساها.

 

نيللي كريم

نيللي كريم من الفنانات اللي الناس كلها اتكلمت عنها في مشهد ضربها لأحمد فهمي بالقلم في مسلسل "لأعلى سعر"، على الرغم من ان ملامح وشها رقيقه وبسيطة الا انها اتحولت 180 درجة في لحظة غضب، رد فعلها بعد خيانته ليها بالمنظر ده ماكنش حد متوقعه على الإطلاق، المشهد ده تداوله رواد مواقع التواصل الاجتماعي وقتها وكل ست مصرية كانت قاعدة في البيت "مبسوطة على الاخر"، والجمل اللي كانت على لسانهم"الله عليكي يا ست، واحسن يستاهل".. أدى آخرة الخيانة يا احمد يا فهمي.

 



مني زكي

أما بالنسبة لمنى زكي، المشهد اللي ظهرت فيه وهي بتدي أحمد السقا، بالقلم في فيلم "أفريكانو"، بعد ما "باسها" بالغصب والإكراه عشان محدش يشوفهم، يعتبر من المشاهد المضحكة واللي ماتتنسيش خصوصا "ريأكشن" السقا ورقصته بعد ما القلم نزل عليه فجأة.." تعيش وتاخد غيره يا سقا".

 


غادة عبد الرازق

غادة عبد الرازق، في أغلب مسلسلاتها لازم تلاقيها جادة وحادة في طريقتها وملامحها وبيليق عليها دور المرأة القوية، و شفناها مثلا وهى فى مسلسل "مع سبق الإصرار"، بتدي أحمد مالك بالقلم على وشه والمعروف إن القلم كان حقيقي مش تمثيل ، وقررتها تاني في فيلم "بون سواريه" لما ضربت رضا إدريس قلم بس إيه مزدوج.. "جبروت يا غادة من يومك".




ياسمين رئيس

بعد ما كانت مقفلة، ومسترجلة في "صنع في مصر" وموضوع الحب عندها متأجل، بدأت تغير من نفسها ومن شخصيتها وحبت أحمد حلمي، فلما شافته بقى واقف مع واحدة تانية الغيرة شعللت في قلبها وتلقائيا وبدون مقدمات أدته قلم معتبر يلا علشان تكمل.. "البنت لما تحب بقى".



داليا البحيري

وعلى طريقة فيلم "عنتر ولبلب" ظهرت  داليا البحيرى، في مشهد من ضمن مشاهد مسلسلها الكوميدي "يوميات زوجة مفروسة" وهي بتضرب زوجها خالد سرحان "السبع أقلام"، مما وصفوها على السوشيال ميديا في وقتها بالست المفترية.





رجاء الجداوي

وفي المسلسل الكوميدي "ريح المدام"، ظهرت رجاء الجداوي، وهي بتضرب أكرم حسني بالقلم، بس الصراحة كان على غفلة، وغير متوقع حتى لينا كمشاهدين.