عباس أبو الحسن عن مطار القاهرة: الوحيد اللي بيخليك تقلع الجزمة مرتين وبيحرز ولاعتك

السبت 10 فبراير 2018 15:51
كتب: بسمة قاسم

انتقد الفنان عباس أبو الحسن، من خلال كتابته عدة ملاحظات، مطار القاهرة الدولي وشركة مصر للطيران، والتي اعتبر إجراءات الأمن فيها غريبة عن باقي إجراءات المطارات الأخرى بالعالم، وذلك خلال صفحته الشخصية عبر مواقع التواصل الاجتماعي «فيس بوك»، وأدرج أبو الحسن ملاحظاته كالتالي:

1- مطار القاهرة هو المطار الوحيد في العالم برمته الذي يجبرك ان تخلع حذائك مرتين وانت مسافر !..مرة عند دخول منطقة السفر ومرة ثانية عند بوابة الرحلة قبل صعودك الطائرة . محدش من الموظفين يملك الإجابة عن ليه ؟!

. المطلوب منك كدولة مُتخلفة نامية ان تتبني التقنية والإجراءات المتبعة في الدول المتحضرة في تأمين سلامة السفر وبس! ..وماتجودش !.يعني احنا اللي فتكين ومجتهدين قوي والغربيين بينحتوا !! الفكرة المتخلفة بتاعة عشان لو عديت من لطخ يقفشها اللطخ اللي بعده فكرة لا ترسخ الا للبلادة وعدم الثقة في النفس وشيوع المسؤلية لدي الموظف العام

٢- في أوربا والدول المتقدمة ، جهاز الأشعة لكشف المعادن إذا مرق منه المسافر دون ان يصفر يتركك فرد الأمن الواقف علي الجهاز تكمل طريقك ولا يعترضك لان ذلك معناه انك لا تحمل أي شيئ معدني ، لكن احنا في مطار القاهرة بنعمل أيه ؟..اسمالله عليك بنجّود ، فتعدي من غير ما تصفر يفتشك رجل الجهاز ذاتي بإديه برضه . تسأله طب ليه تفتشني لما الجهاز قالك انا تمام فيرد عليك بإجابة محفظنهاله وهي " أصل درجة التفتيش عندنا ١٠٠ ٪؜ " تسأله يعني انت مش واثق في الجهاز ! انت أحوط منه ! طب ماتوفره اصلا ! تسأله وانت واثق انه هايرد عليك ب " إيه ! " شفيقيه

٣- مطار القاهرة هو المطار الوحيد اللي فرد الأمن بيفتشك بيه ويحسس عليك من غير ما يلبس جوانتي لاتكس فلك ان تتخيل لو بتبص من خلال ميكرسكوب مجهري هاتشوف ملايين من الجراسيم والڤيروسات اللي الأمن عمال ينقلها بين آلاف المسافرين من بعض

٣- مطار القاهرة هو المطار الوحيد في العالم اللي بيحرز منك الولاعة عند البوابة رغم عدم وجود الولاعة علي قائمة صور الممنوعات اللي في اليافطة جنبه . تقوله : ياعم الولاعة مش موجودة ! يشاورلك علي بند " مواد قابلة للإشتعال" والمقصود بيها الكيروسين وغاز الولاعة وكدة . تسأله: طب لسه ما بتاخدش الكبريت ؟ يقلب عّم شفيق مرة تانية . تجويد من جهبذً اللي حط النظام مرة اخري والفقرة دي شفوي . يعني اللي بيستلم الوردية بيوشوش زميله " ابقي اسحب الولاعات يا زميل "

٤- هو عمر ما حد قال لمسؤول في مصر الطيران عن مدي رداءة المخبوزات عندهم ؟! مصر الطيران قدرت تحافظ علي المركز الاول في أسوء كرواسون وعيش في التاريخ الإنساني وفِي رغبة محمومة في الحفاظ علي هذا المركز علي مدي عقود .