على طريقة "والنعمة ما انا دي اختي منى".. دفاع الفنانين بعد هزيمة المنتخب

الأربعاء 20 يونيو 2018 11:25
كتب: ندا عصام

هجوم شديد تعرض له الفنانين بعد سفرهم إلى روسيا لمؤازرة منتخبهم الوطني الذي يشارك بمونديال روسيا 2018، وكانت تعليقات رواد مواقع التواصل الاجتماعي قاسية، ومن هنا دافع عدد من الفنانين عن زملائهم زي ما هنشوف في الموضوع ده.

وكتب أحمد رزق، عبر صفحته الشخصية بموقع التواصل الاجتماعي "فيسبوك": " على فكره أنا موجود فى روسيا انا و زوجتى وأولادي التلاتة وأكيد مفيش حد عاقل حيعزم خمس أفراد، ومعرفش الأوتيل اللى فيه المنتخب إسمه إيه وعلاقتى بالمنتخب ولاعيبته إنى حتفرج عليهم من المدرجات كمشجع.. وربنا يوفق منتخبنا.. كفاية هرى أبوس ايديكم".




بينما علقت هالة صدقي، عبر "فيسبوك": " يا رب ، قلوب كل المصريين معاكم وبالنسبة للهري من البعض علي سفر بعض الزملاء الفنانين ،أحب اقولكم مفيش حاجه ببلاش وإذا شركه we متوليه مسئوليه السفر للبعض فده مقابل انهم هيعملوا دعايه لwe والمفروض هيلبسوا تيشيرتات عليها شعار we ".

وتابعت: "يعني اي فنان منهم بيدفعلوا، كتير في مقابل الدعايه دي يعني لو حسبناها ماديا هيكونوا خسرانين جدا جدا وخصوصا ان الرحلة مزعجه جدا فهي يومين فقط وتذكره روسيا دي أرخص تذكره مقابل بلاد كتيره ،لكن حبهم لمصر ولوجودهم جانب منتخبهم هو ده الإغراء الحقيقي، فأكيد الفنانين دول مش ناقصهم اي سفريات ولشركة زي we مش عبيطة وبتترمي فلوسها ،مفيش حاجه ببلاش يا سادة، قولت الحقكم قبل تكملوا هري".



بينما دافع صلاح عبدالله، عن زملائه الفنانين قائلًا عبر "فيسبوك": " معلومة هامة وصادقة حبة فرفشة، أقسم بالله عدد كبير من زملائي سافروا على نفقتهم الخاصة لمؤازرة منتخبنا وبعضهم صحب أولاده معه، نعم أنا شخصياً دعيت لروسيا بإلحاح وطلبوا مني جواز السفر أكثر من مرة وأعتذرت لظروفي الصحية شاكراً دعوتهم الكريمة".

وتابع: "من عجائبنا بنحب نتفرج عالفنانين وبنحب نتصور معاهم ونتعرف عليهم وبنحب نهاجمهم!!، شكراً لكل من سافر لدعم منتخب مصر على نفقته أو بدعوة خاصة".

واختتم: "لولا ظروفي كنت سافرت وحضرت هذا الحدث العالمي من بدايته لنهايته على نفقتي الخاصة المقربون يمتنعون عن التعليق على النقطة الأخيرة".



وكان تعليق نبيل الحلفاوي كالتالي: "تمام احنا خسرنا عشان الفنانين اللي سافروا تمام بس اللي محيرني همه فنانين السعودية وتونس والمغرب سافروا متنكرين؟ وماذا عن فناني ألمانيا والأرجنتين؟ يا أمة ضحكت من جهلها الأمم مش مكسوفين من نفسكم"؟

 



ونشر شريف منير فيديو على "فيسبوك": "مش شايفين اللي بيتقال علينا كتير شوية يعني الفريق المصري خسر فيتقال علينا الكلام الجارح ده، يعني لو كان الفريق كسب كان هيتقال كدة، احنا ذنبنا إيه، احنا جتلنا دعوة ز ياي مهرجان سينمائي عبارة طيران واقامة فقط لا غير يعني مش واخدين مقابل بالعكس احنا بنصرف هناك، عشان الفريق خسر فاحنا نتحمل الموضوع ليه هو احنا اللي لعبنا وقصرنا، احنا كنا بنتفاعل في الملعب زي المصريين الموجودين وهي الكرة كدة مكسب وخسارة، ليه يتقال مطلبتية ورقاصين والفاظ مش كويسة".