شريط كوكتيل.. غناء وتقليد علي ربيع "ماركة مسجلة"

الاثنين 11 يونيو 2018 13:50
كتب: ندا عصام


من بداياته في تياترو مصر ومن بعدها مسرح مصر مع أشرف عبد الباقي،على ربيع مايقدرش يفوت فرصة، ومايغنيش ولا يقلد، وفي مسلسله "سك على اخواتك" اللي بينافس به في رمضان السنة دي شفناه بيغني لأكثر من مطرب ومطربة لكن على طريقة على ربيع، فتعالوا نشوف عمل إيه بالظبط.

في مشهد من المسلسل ظهر نجم مسرح مصر، وهو بيغني للنجمة المغربية سميرة سعيد، أغنيتها الشهيرة "قال جاني بعد يومين" بس الصراحة علي ربيع غناها مع الطبلة ورقص مع سلوى خطاب، فكانت حاجة كدة شعبية.. "احنا اسفين يا ديفا".




وفي مشهد تاني علي ربيع، ماسبش حسن الأسمر، في حاله وغنا مع اخته اللي هي سهر الصايغ، أغنية "أنا مين" ولكن على طريقتهما الخاصة ،وفي ناس كتير اكتشفت إن سهر، تمتلك صوت حلو مش بطال، فالدويتو ده بصراحة فكرنا بنجم الأغنية الشعبية.. "الله يرحمك يا فنان".




وعلى طريقة أحمد مكي، قرر علي ربيع، تقليده بطريقة كوميدية من خلال غنائه لأغنية راب قال في بدايتها "وأنا ماشي في الطالبية ذكريات عدت عليا الشباب الجدعان واقفين حواليا عربية الفول عربية طعمية البتنجان الـ مية مية"، وأكد بعدها إنه عملها علشان "مكي" من الطالبية.




والمعروف إن علي ربيع، بيعشق الغنا وخاصة الأغاني الشعبي، وفي مشهد خطوبة شقيقته ظهر على المسرح وهو مرتدي جلباب صعيدي وبيرقص ويغني على المهرجان الشهير "الهلى بلي"، ف"سعادة" عمل الواجب وزيادة الحقيقة وخلى الناس كلها ترقص وتهيص.