دخول مفاجئ..فنانين رجعوا بعد سنين بأدوار مميزة

الثلاثاء 29 مايو 2018 12:35
كتب: ندا عصام

فنانين كتير أوي وحشنا وجودهم على الشاشات خلال السنين اللي فاتت، اللي منهم كان اعتزل الفن واللي كانوا موجودين "بس مش أوي يعني"، لكن مؤخرا كتير منهم عمل رجوع مفاجئ ومميز بشكل كبير.


 إبراهيم نصر

إبراهيم نصر، من الممثلين "التقال" أوي، أينعم الجمهور دايما شايفه في قالب برامج المقالب اللي اشتهر بيها والشخصيات اللي عملها في البرامج دي زى "زكية زكريا"، إلا إن رجوعه للدراما كان مفاجأة ظريفة، والكل بقى مستنى الشخصية اللي هيقدمها بفارغ الصبر، خصوصًا أنه يمتلك جميع أدوات التمثيل وقادر على تجسيد أي دور وقادر أنه يضحكك ويبكيك في نفس الوقت، وفي الموسم الرمضاني السنادي ظهر "نصر" في مسلسل "فوق السحاب" مع هاني سلامة، بوجه جديد تمامًا من حيث الشكل والدور.



نادين

"الفراشة أم روح حلوة" ملكة الفوازير رجعت نورت تاني بعد اعتزالها الفن حوالي 17 سنة ، خبر عودتها بسط ناس كتير أوي، ورجعت "نادين" من جديد السنادي من خلال مشاركتها في مسلسل "ليالي أوجيني" مع ظافر العابدين وأمينة خليل، وفي النهاية "فرحنا برجوعها".

صورنا معاها قبل رمضان: اتفرج وشوف ايه اللي رجعها للتمثيل وايه حكاية السكر قراقيش


 


فارس رحومة

بعد غياب 21 سنة عن الأضواء من ساعة مشاركته في فيلم "المصير"، و"ليلة في القمر" سنة 2008، رجع فارس رحومة للشاشات من خلال مسلسل "لعنة كارما" اللي بتنافس بيه هيفاء وهبي رمضان الحالي، وياسر في المسلسل قايم بدور رجل أعمال وسيم واتنصب عليه و"بيتكلم عربي مكسر".



بسمة

بعد فترة اعتزال وغياب عن الشاشات وبالأخص المواسم الرمضانية، أخدت بسمة قرار الرجوع من خلال دور بطولة مع نيللي كريم في مسلسل «اختفاء»، وطلعت بشكل مختلف وجديد "ولسة هنشوف كتير في المسلسل".