مش نجوم تمثيل وبس.. دول مطربين كمان

الأربعاء 8 أغسطس 2018 14:45
كتب: ندا عصام

في مثل شعبي مشهور بيقول: "اللى يخرج من داره "كاره" يتقل مقداره"، ممكن يكون صحيح بنسبة كبيرة أوي بس برده في شواذ للمثل يعني أنه مش ماشي على كل الحالات في ناس بتعمل كار غير كارها وبتنجح فيه، والمثل ده ينطبق على عدد من الفنانين، اللي مالهومش دعوة بالغنا، لكن في الحقيقة الجمهور حبهم، ونجحوا، وكسروا الدنيا، وحققوا نسب مشاهدة عالية، وفي منهم اللي عمل ألبومات كمان..

 

محمد رمضان

محمد رمضان أو "الأسطورة"، على الرغم من أنه مالهوش علاقة بالغنا وماعندهوش الموهبة اللى تخليه نقول عليه مغني ، إلا إننا دايما بنشوفه على الساحة بيغني سواء في إعلانات أو أفلام أو غيره، الغناء مش مهنة أساسية ليه بس الظاهر كده انه حابب المنطقه دي ، وعلى رأيه "الساحة دي بتاعته".

محمد رمضان بيحب يظهر لجمهوره بشكل خفيف مش في دور المطرب اللي بجد، زي مثلا كليبه الأخير "نمبر وان" اللي بيقول فيها "" ، وفي إعلان اتصالات لما قال "انا لو لو لمحته هينونو" مع حركة أيديه اللي الشباب كلها بعدها قلدتها، ومؤخرًا كليب "الملك" اللي قلب به الدنيا على السوشيال ميديا.

 






ياسمين عبد العزيز

تعتبر ياسمين عبد العزيز، من الفنانات اللي ليهم طلة خفيفة ومميزة، بقى لازم في كل فيلم ليها تلاقيها بتغنى مع أضافه روحها اللي بتخلي الجمهور يحبها ويحفظ أغانيها، وده شفناه من أيام فيلم حاحا وتفاحة لما غنت "أنابيب وبعد كده "اسيبه ليه، الدادة دودي، واخرهم في فيلم "ابلة طمطم".

 









رامز جلال

من يومه، ونفسه يبقى مطرب من ايام فيلم "الباشا تلميذ" لما غني لمحمد محيي "قادر وتعملها"، اللي يعتبر من أهم المشاهد المضحكة اللي فضلت معلقة معانا، وبعدها اتعود رامز، في أفلامه انه يغني حتى ولو أغنية واحدة ليها علاقه بالأحداث، ده غير برنامج المقالب اللي بينافس به في كل موسم رمضاني وبيغني أغنية البداية والنهاية والحقيقة مفيش حد مش بيستني أغنية البرنامج خصوصا أن بيبقى ليها علاقة بنوعية المقلب.

 









محمد سعد

محمد سعد، كاراكتر مختلف، وحتى في علاقة التمثيل بالغناء عنده، مش هننكر انه مش مطرب خالص، بس اغانيه في أي عمل بتبقى حالة لوحدها مين ينسى لما غني بالصعيدي "كتكوت ضعيف الجناح والدنيا غدرت به"، و"كله كله كوم وزعلك انت كوم"، والسلك لمس".






الموضوع مش جديد على الوسط الفني، لأ ده إحنا شفنا من سنين كتير أوي نجوم كبار لهم أسمائهم، في دور المغنين على الرغم من أن مهنتهم الأساسية التمثيل وليس الطرب كان أشهرهم النجم الكبير عادل إمام، في اكتر من عمل سينمائي زي"حنفي الأبهة"، ومسرحية" الزعيم"، وطبعا مانقدرش ننسى الراحل أحمد زكي، في "كابوريا" و" البيه البواب" و"استاكوزا"، والأمر وصل عند نجم أسطوري زي الراحل محمود عبد العزيز إنه قدم ألبوم بيجمع أشهر أغانيه، "صاحب الكيمي كيمي كا" حالة عبقرية لن تتكرر أكيد.