قبل سفرك لروسيا.. "حاجات تحطها حلقة في ودنك"

الاثنين 28 مايو 2018 11:05
كتب: نهى حمدي

حجزت تذاكر المباريات، والطيران والفندق، وخلاص مسافر لبلد كأس العالم لتشجيع المنتخب المصري في كأس العالم "بعد شوقه"، الحكاية مش حجوزات وخلاص الأهم من الحجز هو "ظبط التظابيط"، لأن هناك أمور مهمة لابد من وضعها في حسبانك عند سفرك إلى بلد الدب القطبي، فليس أمامك إلا شهرين و5 أيام ويبدأ مونديال روسيا 2018.

 

الروسي "مش خراشوا بس "

تعلم اللغة مهم جدًا لأن من الصعب التعامل هناك بـ"الانجليزي" فقط، والعربي شبه مستحيل، فعليك وعلى المركز الثقافي الروسي "يا معلم"، حاول تأخذ "كام كلمة علشان تنجز وقتك"، أو على الأقل معرفة الأساسيات "عشان تمشي حالك هناك"، لو "الدنيا مزنقة معاك في الجنيهات" ممكن تخصص 3 ساعات كل يوم وتعلم نفسك بنفسك من أي "أبلكيشن" تعليم لغات أو حتى "اليوتيوب".

 

الملابس

يمكن اللبس أهم من الفيزا نفسها "أوعى يخدعك الجو عندنا، احنا مالناش دعوة يا موهي" هناك الجو هيكون برد و"مش أي برد لا ده على حق"، فأعمل حسابك على جواكيت وبالطو، وأكثر من "الفرو والصوف عشان تتدفى كويس".

 

جدول "الماتشات"

محتاج تحفظ جدول الماتشات أكثر من جدول الضرب"ده لو كنت حافظة"، وتعرف مواعيد الماتشات، وأماكنها وبعدها عن الفندق الذي تقييم فيه، ومعرفة المواصلات المتاحة لتنقلك بأقل التكاليف من وإلى المكان المقيم فيه، ومحاولة النزول في مدينة تكون قريبة لكل المباريات التي تنوي مشاهدتها، وفي المذاكرة أيضًا إفادة وهي إنك "ماتحجزش مباريات مش عايزاها".

 

رياضة و"دايت"

خلال الشهرين "خلي الجيم حاجة أساسية عشان الفورمة"، و"البادي بيلدينج" فهي تفيدك جدًا منها ترسخ صورة حلوة لبلاد الفرنجة بان الشباب المصري "زي الفل" ومنها "تعجب الروسيات أو تتجوزهم" وتكون ضربت عصفورين بحجر واحد.

 

الطيران و"شوية حاجات فوق بعض"

وإذا لم تكن حجزت تذاكر الطيران والفندق أو "الهوستيل" حاول إنك تحجز الطيران خلال هذه الأيام لأن كل ما المعاد يقرب كل ما الأسعار تعلى وتكون غالية أكثر، "الكلام ده على تذاكر الطيران والهوستيل أو الفندق"، ومن الممكن أن لا تجد مكان في هوستيل أو الفندق في منطقة قريبة من الإستاد الذي يقام فيه المباريات "هناك هيبقى أزحم من شاعر خالد ابن الوليد في الصيف والله".

بالإضافة لكل ذلك أعمل حسابك في أكلات "دراي فود زي الفول والتونة والجبن وغيرها من الأكل المعلب اللي ممكن تاخده معاك من هنا لهناك لأن متضمنش الأكل هناك هيكون عامل إزاي وبكام وكمان شوية فكة معاك متعتمدش على البنك بس إنك تقدر تسحب منه بره عشان متقعش في المشاكل"، وفي النهاية عزيزي "تروح وترجع بالسلامة".