جايزة النجمة الأكثر ضربا في رمضان تكسبها آيتن عامر

الخميس 31 مايو 2018 11:21
كتب: ندا عصام


الدراما الرمضانية السنة دي كلها كوم، وشخصية "سماح" اللي بتقدمها ايتن عامر في "أيوب" كوم تاني خالص، شخصية كده "استغفر الله العظيم" كوكتيل ما بين "الشرشحة" والشر والغيرة والحقد والندالة، آيتن عامر خدت كمية ضرب، وكام علقة ساخنة خلال الحلقات اللي فاتت ملهاش حل، وانطبق عليها الجملة الشهيرة "كله ضرب ضرب مفيش شتيمة ولا إيه"، ففي مشاهد الناس اتعاطفت معاها، ومواقف تانية أكدوا انها تستاهل وربنا خد حق اخوها منها، تعالوا نشوف كم مرة "اتمرمطت"، واتضربت آيتن عامر على مدار 14 حلقة.

 

علقة بالشبشب

في الحلقة الخامسة راحت سماح لمنزل عمتها عشان تقنع ميريهان حسين"رغدة"، بالطلاق من شقيقها "أيوب"، والزواج من محمد لطفي "حسن الوحش"، مقابل فلوس، فلما سمعتها عمتها "سلوى عثمان" مقدرتش تمسك نفسها، وضربتها ضرب، ومش أي ضرب، لأ بـ"الشبشب"، وبصراحة ده عجب جمهور السوشيال ميديا، واتكلموا كتير عن المشهد ده.

 


ضرب بالإيد

المرة دي آيتن عامر "كلت علقة محترمة" من زوجها "منصور" اللي بيقدم دوره دياب، ففي الحلقة السابعة من المسلسل حصلت خناقة بعد ما عرفت إن "سماح" ستتزوج من "حسن الوحش"، وان عيشتها هترتاح فالغيرة شعللت، فطلبت من زوجها شقه بس بشرط تكون احسن منها، فحصلت خناقة كبيرة ولم يتمالك "منصور" أعصابه وضربها ، لكن في لحظة أخبرته بأنها حامل وتوقف عن ضربها مما تم نقلها إلى المستشفى وفقدت الجنين.. بس في النهاية اللي بيبص لعيشه غيره زي سماح يستاهل يحصل فيه كده واكتر.

 


ضرب وفضيحة "الأتنين"

ربنا خد حق "رغدة، وقررت تنتقم من" سماح" بس بفضيحة كبيرة من خلال فخ نصبه زوجها "دياب" و"حسن الوحش"، اللي لعب عليها وراحت لبيته ليكتشف زوجها الخيانة ويقوم بضربها، ومن ناحية أخرى تستأجر" سماح" سيدات بعد ما بقت "معلمة" ليقمن بضربها علقة ساخنة في الشارع وتهددها بعد كدة بالفيديو.. "ودي أخرتها يا سماح ارحمي نفسك شوية".

 

فى النهاية بقى بعد 3 علقات محترمة من 14 حلقة فاتوا من المسلسل سؤال شاغل بال ناس كتير دلوقتي ضرب آيتن عامر كدة انتهى ولا يا ترى لسة في كمان؟