كورة × فن.. عثمان ديمبلي طلع ابن عبد الغفور البرعي

السبت 21 يوليو 2018 14:53
كتب: محمد جمال

يمكن عنوان الموضوع خضك شوية إزاي عثمان ديمبلي لاعب برشلونة الإسباني يطلع في الآخر عبد الوهاب "محمد رياض" ابن عبد الغفور البرعي "نور الشريف" في مسلسل لن أعيش في جلباب أبي.

بس لو أنت كنت تابعت الحلقة الأولى من مسلسل "كورة × فن اللي بنقدمه على اتفرج ممكن مكنتش تستغرب أوي.

خليني أقولك كدا في السريع إننا بنعمل حلقات بتربط فيها المواقف اللي بتحصل في الملاعب والرياضة بشكل عام وبتتشابه بأحداث عمل فني سواء فيلم أو مسلسل أو غيرهما من الأعمال الفنية.

وعشان مطولش عليك في الكلام تعالوا بينا يلا نعرف إزاي عثمان ديمبلي لاعب برشلونة طلع ابن عبد الغفور البرعي.

مسلسل " لن أعيش في جلباب أبي" من أشهر المسلسلات للنجم الراحل نور الشريف وفي الدراما المصرية والعربية ولقى إعجاب ناس كتير حتى كل ما يتعاد على القنوات تلاقي الناس بتحب تتفرج عليه.

القصة اللي تهمنا من المسلسل هو حال عبد الوهاب ابن عبد الغفور اللي متمرد على أبوه وشغله ومش عاجبه الشغل دا مش بس كدا دا مش عاوز حتى يروح يساعد أبوه على الرغم من إنه شغل بيكسب أوي.

وفي نهاية المسلسل بعد صراع كبير أوي بين الأب والابن وعوامل كتير أكدت للابن انه غلطان راح اشتغل مع أبوه واتعلم الشغل بسرعة وبقى خبرة في المجال.

مش يكتفي بدا لا رجع تاني الابن يتمرد وقرر أنه يفتح شغل لحسابه الخاص بعيد عن والده وانه ينافسه كمان " بغض النظر هنا عن موقف الوالد اللي كان مبسوط لان دا في الأول أو الآخر ابنه وعاوز يسيبه يجرب يشق طريقه بنفسه".

وجه الشبه في قصتنا مع ديمبلي إنه كان لاعب محدش يعرف عنه حاجة قبل ما يروح فريق دورتموند اللي رباه وكبره وعمل منه نجم كبير جدًا.

ولما برشلونة دخل في مفاوضات مع دورتموند عشان يتعاقد معاه النادي رفض بس اللاعب كان مصمم على الرحيل ودا اللي خلاه يتمرد على النادي وينقطع عن التدريبات من أجل الرحيل عن الفريق لحد ما أجبر إدارة دورتموند على الموافقة.

تقريبًا نفس المشهد دا على أعتاب أنه يتكرر تاني بين اللاعب نفسه وإدارة برشلونة.

ديمبلي إصاباته الموسم اللي فات كانت كتير ودا خلاه خارج الحسابات الفنية للجهاز الفني بشكل كبير في الوقت نفسه دخل برشلونة في مفاوضات مع الجناح البرازيلي ويليان لضمه في الصيف الجاري.

والمفاوضات دي مزعلة ديمبلي أوي لأنه حاسس إن فرصه هتكون أصعب في وجود ويليان فهل بقى يتمرد تاني على برشلونة اللي مبيفكرش في بيعه ويرحل خاصة وإنه عنده عروض من أندية كتير دا اللي هنشوفه من ابن عبد الغفور البرعي في الفترة اللي جاية.