لو بتحب قعدة الحسين.. زينب خاتون مكان من عالم تاني

الثلاثاء 12 يونيو 2018 13:36
كتب: محمد عباس

المكان اللي هنتكلم عليه دلوقتي هياخدك لعالم تاني بره كل الروتين اللي بيحاصرنا على أرض المحروسة، كثير مننا بيحب يروح الحسين، يعيش الأجواء اللي هناك، شارع المعز وباب النصر، المعروضات والمشغولات، حاجات كتير بتشدنا دائما لأجواء مصر "اللي بجد"، بس بتبقى مشكلتنا دائما الزحمة، وغلاء الأسعار، و دول الحاجتين اللي مش هتلاقوهم في زينب خاتون.

 

قهوة زينب خاتون هو مكان عبقري هتكتشفه لو قررت تعدي الناحية التانية من صف قهوة أم كلثوم و شارع المعز، وخلف جامع الأزهر، ولوجوده في مكان منعزل شوية، ده بيخلي الوصول له أسهل والطريق اقل في زحمته.

 

المكان عبارة عن قعدات عربي على شكل كنب وفي جزء داخلى غير المكان الواسع جدا والمميز اللي موجود بره، هناك الأكل حلو جدا بس بننصحكم بالمحاشي والمشويات، وده مايمنعش أن السندويتشات كويسة وسعرها مناسب جدا، بس أوعى تمشوا من هناك و انتوا ماشربتوش براد الشاي اللي ينزل مع عطارة متنوعة، في شيشة كويسة هناك كمان لمحبيها، والأسعار كلها مناسبة جدا ودي الحاجة الثانية اللي اتكلمنا عليها.

 

تجربة زينب خاتون عظيمة، أجواء المزيكا اللي بتشتغل هناك، واللي أحيانا بتكون تخت شرقي كامل، الألوان والإضاءة، وجودك في مكان أثري بين منزل زينب خاتون وبيت العود العربي، المشغولات اللي بتتعرض في الحارة اللي جنب المكان، حاجات كتير أوي هتخليك تروح هناك دايما.