لو صاحبك اتعلم عليه.. 5 حاجات تداوي جراح «الفركشة»

الاثنين 16 إبريل 2018 18:10
كتب: نهى حمدي

جرح الحبيب للحبيب صعب والفراق أصعب "واحنا اللي بنشيل الطين" أما يكون المجروح عاطفيًا هو صاحبك المقرب أو فرد من أفراد "الشلة الموقرة" يتجرح من هنا وتبدأ رحلة علاج الجرح العاطفي على إيد الأصحاب، خروجات، سفر "تتشقلب قدامه" لإخراجه من هذه الحالة المريرة والأليمة، ولكن مع فشل كل المحاولات التي قمت بها في محاولات أخرى جربها "يمكن تتفك عقدته".

على القهوة

لا تتركوه وحيدًا على أي حال "متضمنوش يعمل إيه " بالأخص لو الجرح عميق وهو مجنون "الميكس ده هيكون نتيجة قطع شرايين"، فأينما وجدتم "اسحبوه معاكم" في قعدتكم على القهوة الضحك والكلام واللمة تنسي أي حد أي حاجة.

في البيت

كنوع من التجديد "مش هيبقى كل يوم قهوة قهوة هيزهق كده وبدل ما نعالجه من الجرح هيبقى جرح واكتئاب اتفقوا تتجمعوا في بيت واحد من "الشلة .. ويا سلام لو روف" قاعدة حلوة أكل وعصائر و"شبرقوا على نفسكم بشوية مكسرات" وهاتك يا كلام عن الكرة والشغل حتى "لو طريقة عمل المسقعة هياكل معاه  برضوا".

ووسط كل الكلام والأكل "اسحلوه في البلايستيشن بس متتكوش أوي هو يتغلب دور وسيبوه يكسب دور عشان يفرح، وحفلة البلايستيشن ممكن تكون يوم لوحدها فيها بتاع 5 ساعات بره الكوكب"، وبعد "البلاستيشن" دخلوه "بولتين استميشن" يدمر دماغه وذكرياته فيهم بتاع ساعتين أو ثلاثة.

السفر

المفتاح السحري فغير إن الهدف منه في الأساس هو النسيان و"فرم أي حاجة عن المحبوبة" إلا أنه هيخلق ذكريات جديدة تفتكروها أما تقعدوا مع بعض في ساعة صفا وتضحكوا، وطبعًا الاختيارات مفتوحة قدامكم من الساحل لـدهب، وهو أسبوع بعون الله وهينسى لوحده شكلها واسمها "الرجالة كده بترمي ورا ضهرها بسرعة".

البنات

أما  إذا كان المجروح بنت "خد عندك بتاع 6 شهور عشان تقدر تتعافى من الجرح، الموضوع بيبقى أصعب عند البنات من استئصال ورم"، فعلى مدار هذه المدة الطويلة حاولوا "برضوا  متسيبوهاش لوحدها  لأن غير إنها تعمل  في  نفسها حاجة التفكير وبروفيل الـإكس هيدمروا صحتها" ففي هذه اللحظة شجعوها تعمل  "بلوك" أو على الأقل  تخفف من أبراج المراقبة "عشان نفسها".

"الشوبينج"

شدوها من إيدها وتنزل تعمل "شوبينج" و"نيولوك" الموضوع هيفرق معاها كتير جدًا.

مفاجأة

اتجمعوا ولموا "شوية الفكة اللي معاكم" واشتروا لها كل ما تحبه وتغرم به سواء كان على هيئة أكل، أو هدايا أو حتى "كلب"، الإحساس هيكون لا يوصف وساعتها "هتحس إن عندها ناس تحبها جدًا وبناقص حب الناس التانية".

فسحة 

"ظبطوا لها فسحة حلوة ورايقة عشان السفر مش مسموح لكل البنات زي طلعت خيل في الجيزة أو سينما أو غيره" من خروجات الانبساط والدلع، "ومع كل ده  استحملوا عياطها وشحتفتها على المحروس في وسط الخروجة، فترة وهتعدي".