"ماتبقيش قطة مغمضة".. 10 علامات "تقفشي بيها خيانة جوزك"

الاثنين 16 إبريل 2018 22:10
كتب: نهى حمدي

"أنا بتخان وعاملة نفسي مش سامعة ولا شايفة .. أنا بتخان ومش حاسة بأمان خالص مفيش فايدة"، كوبلية شهير للفنانة أصالة لخصت فيه مشهد الخيانة وتعاملها مع خيانة زوجها ليها وعلى الرغم من معرفتها  بالخيانة إلا أنها مكملة، ولأن دي أمور شخصية لا داعي للتطرق إليها، ولكن الأكثر لفت للنظر في هذا الموضوع إن أصالة عرفت خيانة زوجها "إزاي؟" والأهم "ليه خان وإمتى أي راجل بياخد قرار الخيانة الزوجية ؟".

ولأن عزيزتي لا نسمح لك بأنك "تفضلي قطة مغمضة " قررنا نفتحهالك ونقولك الراجل بيخون "إمتى؟" و"ليه والعلامات اللي بتقولك ده خاين اطلقي"، بعد إجماع الآراء وتصدر "هاشتاج الراجل بيخون إمتى" اتفقت الغالبية على إن الراجل بيخون في أي وقت على مدار 24 ساعة، لكن ما يدفعه للخيانة "غير إن عينه زايغة بالفطرة" هو إهمال الزوجة لنفسها أو عدم وجود أرض حيادية يقف عليها الاثنان، أو استحالة الحياة الزوجية، ومن الفجوة تكبر بين الطرفين والحياة تكون صعبة.

أما عن "إزاي تقفشي خيانة جوزك" فهناك 10 خطوات لا غيرهم "يراهم الأعمى والنايم على صرصور ودانه"، أولًا: عند سؤالك لها "كنت فين وبتعمل إيه ومع مين ؟" ستلاحظين إن وجهه اتخطف لونه ومال إلى الأصفر وفي بعض "التهته" في الرد.

ثانيًا: يحكي ويسترسل في كلامه ويقول تفاصيل كثيرة على غير العادة عن يومه وحياته، "عشان بيكون مظبط الكلام في دماغه وبيسمعهولك".

ثالثًا: التوتر يبدأ يتملكه بمجرد سؤالك عن رائحة "شمتيها على القميص أو بقعة روج أو غيره ".

رابعًا: خوفه من الخروج معك إلى الأماكن العامة ويخرج بحجة شكل.  

خامسًا: ستشعرين من داخلك "إن في حاجة مش مظبوطة " وتغيره في الناحية العاطفية.

سادسًا: الهدايا بسبب ومن غير سبب، خاصة لو هو "مش متعود على كده".

سابعًا: خوفه على "الموبايل" من إنك تمسكيه وحذفه الدائم للرسائل، غير إنه لا يترك الهاتف من إيديه لفترات طويلة ومتواصلة.

ثامنًا: يتهرب من النظر في عينيكي فهذا دليل على أنه يخفي شيئا ما.

تاسعًا: إحباطك "ويطلع فيكي القطط الفطسانة".

عاشرًا: تغيير ذوقه في الملابس على غير المعتاد.