رئيس جمهورية نفسه.. جمل قالها محمد شرف وهتفضل عايشة

الأحد 29 يوليو 2018 12:50
كتب: ندا عصام

ظهوره لوحده كان كفيل انه يضحكك من قبل ما تعرف حتى شخصيته إيه في الفيلم، ولما قرر يورينا الدراما، خلى الكل عينيه تدمع، كان دايمًا بيبقى إضافة لأي عمل مهما كان حجم دوره، الكلام عن العظيم محمد شرف، اللي رغم رحيله، بس هيفضل عايش وسطنا بكل كلمة قالها بأسلوبه المميز جدا، وهنفضل نستخدمها زي ما اتعودنا، وزي ما كان هو بيستخدمها بالظبط.


ظرف طارق

ظهر "شرف" في مشهد واحد بس، جسد من خلاله شخصية " بسيوني مراد الحيوان"، المشهد كان عبارة عن أنه دخل شقة أحمد حلمي فجأة وقال "سامو عليكو التلاجة فيها مية أصل أنا جعان أوي أوي، وأنا مش تبع حد أنا رئيس جمهورية نفسي"، عرف نفسه وقتها "إنسان يعيش و يتعايش"، وجاوب بعد الاستفسار عن المنتخب اللي بيشجعه، بكل بساطة وتلقائية قائلا:" "واحد مصري هيشجع إيه، نيجيريا طبعًا".


 


عسكر في المعسكر

وطبعا ماحدش يقدر ينسى دور "البرنس"  في فيلم "عسكر في المعكسر"، فظهر "شرف" في مشهد كوميدي مع محمد هنيدي، جملة "عيش معايا اللحظة يا شاويش خضر أشوفك لوا يارب"، كانت أهم ما في الدور وقتها.




أسف على الإزعاج

في الفيلم ده بالتحديد ابتعد محمد شرف عن الكوميديا، واثبت أنه ممثل بجد بيعرف يجسد كل الشخصيات مش كوميدي وبس، وجسد "شرف" دور من أهم وأعظم الأدوار اللي قدمها طول مسيرته الفنية، فجسد شخصية العاطل صاحب النظر الضعيف اتعرف على أحمد حلمي في القهوة اللي دايمًا بيقعد عليها لأنها زي ما وصفها "أصيلة، وبتحتوي البني أدم"، جملته لـ"حلمي" اتحفرت في اذهان الجمهور لما قاله "‏هما بيتكلموا عن قطر واحد مع إنهم كذا قطر, قطر الشغل, قطر العمر, قطر الجواز, تركب قطر الشغل يادوب تعمل لك قرشين تلاقي قطر الجواز فاتك وهوب قطر العمر يتقلب بيك".




زكي شان

رغم مساحة الدور الصغيرة، إلا أن "شرف" دايما الجمهور فاكر افيهاته، وفي فيلم "زكي شان" اشتهر محمد شرف بجمل "اضرب كمان عايزة اتوب"، "اضرب كمان قفلهوملى باكو".




الرهينة

محمد شرف، قام بدور "عماد القبطي"، في "الرهينة"، وكان ليه أكتر من جملة علقت معانا لحد الوقت اللي احنا فيه دلوقتي منها "عماد مأكدلي، افتح ياعم أنا عمدة، أومال ياعم فور باي فور يا جدع، احنا من امتي بنسأل الاسئلة دي يا كلاوي".


صباحو كدب

في فيلم "صباحو كدب"، قدم شخصية الصديق المقرب من "نعناعة" الكفيف، اللي هو أحمد آدم، فكان دايما دراعه اليمين ليكتشف في النهاية أنه غشاش، ومن أكتر الجمل اللي خرجنا بيها من الفيلم "ده مش لينا ده تاكس لازق فينا".





جعلتني مجرما

كعادته برضه، ظهر محمد شرف، في الفيلم بدور كوميدي، وهو المعلم مشمش، تاجر المخدرات وصاحب غرزة، وكان قاعد معاه احمد حلمي وإدوارد، وكان كل ما الشرطة تيجي بيخفي كل المخدرات وكأن مفيش حاجة ما هو "صابون ثقافي بقى".


 


اكس لارج

قدم دور بواب عمارة في فيلم "اكس لارج"، اللي بيسكن فيها بطل الفيلم أحمد حلمي، ومن أشهر جمله فيه "أنا صبري البواب انت مش شايفني"



قصة الحي الشعبي

شخصية كوميدية جدًا ظهر بيها محمد شرف، في "قصة الحي الشعبي"، طريقة كلامه بـ"ريأكشن" وشه اللي مالهوش حل، دوره كان عبارة عن أنه بيساعد الفرقة في الوصول لـ"بنت دهبية" وبعد ما وصلها كانت المكافأة ليه "هرشة جماعية"، فكان مشهور هنا أوي بـ "الهرش"، أصل عايز إيه من واحد اسمه "بكتيريا"؟