التغيير مطلوب برضه.. نجوم الطرب الرومانسي اللي قلبوها شعبي

الثلاثاء 7 أغسطس 2018 11:28
كتب: ندا عصام

مطربين كتير اتعودنا نشوفهم في حتة معينة أو بمعنى أصح في لون معين يعني مثلًا زي الرومانسي، ومافكرناش في يوم اننا نشوفهم في اللون الشعبي، لأن السكة دي صعبة، وليها مطربينها زي النجم العظيم أحمد عدوية وحسن الأسمر وغيرهم، والحقيقة إن مش أي مطرب يقدر يغني شعبي ويقنعك، لكن في مطربين خدوا القرار، ودخلوا منطقة مش منطقتهم  تعالوا نشوف كدة مين هما، وهل نجحوا فيها، وممكن يكرروها ولا لأ؟!

 

حسين الجسمي

الجسمي دايما بيحب التنوع في أغانيه من حيث الكلمات واللحن والتوزيع بيحب يخرج عن المألوف، غنى حزين وغنى رومانسي وغيره والصراحة حبينا في كل حاجة، لكن اننا نشوفه بيغني على الموسيقى الشعبي ف ده جديد تماما، الجسمي فاجأ جمهوره بأغنية جديدة بعنوان "أبوك وأمك" كتب كلماتها أيمن بهجت قمر ولحنها وليد سعد، أغنية مختلفة وصوته فيها بارز بشكل قوي.. الحقيقة حسين الجسمي مطرب بكل اللهجات والألوان.

 



هاني شاكر

هاني شاكر، يعني "هو انتي لسه بتسالي، غلطة وندمان عليها، وعلى الضحكاية" هو ليه لون ومنطقة معينة ماكنش بيخرج عنها أينعم نجح فيه بس كان محتاج في فترة معينة لنوع من التغير، أغانيه عايشة معانا، بس فجأة حب هاني شاكر، يثبت انه يقدر يغير من نوعية أغانيه المعتادة عليها سواء الرومانسي أو الكئيب، وقدم لينا أغنية على الطريقة الشعبية وهي" هشكي لمين ياعيني".. "التغير مطلوب برضه".

 



لطيفة

خرجت لطيفة من الجو التقليدي، لتنضم لقائمة الفنانين اللي بيغنوا شعبي، لطيفة مشهورة بـ"بحب في غرامك، غرامك مزيف"، والحاجات اللي احنا عارفينها دي، لكن جه الوقت اللي نشوف لطيفة بثوب شعبي من خلال أغنية "ياللي"مع المطرب الشعبي أحمد شيبة، لطيفة عملت جو شعبي مع شيبة ماحصلش، نقدر نقول حاجة كده بهجة ورقص وأخر روقان.




راغب علامة

راغب علامة يعتبر من المطربين اللي بيحبوا دايما من استايل اغانيهم يعني مش ماشي على نفس نمط "قلبي عشقها، واسف حبيبتي، ومغرم يالليل" ليفاجأنا في الفترة الأخيرة ويلفت النظر بأخر أغانيه وهي "اللي باعنا خسر دلعنا".. ولاقت ردود أفعال قوية وتخطت نسبة مشاهدتها على "اليوتيوب" لـ 14 مليون مشاهدة، فراغب قال إيه! "واللي سابنا قفلنا بابنا.. يلا بينا وفرنا تعبنا الحياة مش واقفة عليه".