أهمهم تامر حسني.. 5 نجوم طرب قرروا يمثلوا من غير ما يغنوا

الثلاثاء 24 يوليو 2018 11:42
كتب: ندا عصام

هو المطرب له إيه إلا صوته، وكام "عربة" حلوين يسلطنوا السميعة اللي بيحبوه، الكلام اللي فات ده ننساه خالص، بعدما اثبت فشله بظهور مطربين كتير لاحظنا خدوا قرار الخروج لجمهورهم في شكل ممثلين فقط، وليس كمطربين، ولكن من أجل إثبات قدراتهم التمثيلية، تخلوا مؤقتا عن نجومية الغناء، بس المهم إن معظمهم حقق نجاح كبير، وأقنعونا أنهم ممثلين من الدرجة الأولى مش مطربين وبس.

 

تامر حسني

على الرغم من أن تامر، يملك صوت مميز وبه إحساس لا يوصف، إلا انه حرص على أن يظهر لجمهوره في ثوب الممثل فقط وليس المطرب، من خلال فيلمه الأخير "تصبح على خير"، تامر، كان قاصد يظهر بالشكل ده حتى يثبت قدراته التمثيلية وبالفعل نجح ببراعة شديدة، بشهادة كل من حوله وجمهوره والنقاد أيضا، فيلم مدته ساعتين شفنا تامر حسني بيمثل فقط، وفي الحقيقة نقطة اتحسبت له في مسيرته الفنية.

 

مي سليم

تعتبر في معظم أعمالها السينمائية والدرامية، بتظهر من غير ما تستغل موهبتها الغنائية، دايما بتفصل الغنا عن التمثيل، وشفنا ده في مسلسلها الأخير "الرحلة" وقبلها في "اختيار إجباري، وكيد الحموات، ولي العهد، والأب الروحي، وحواري بوخارست، والصياد، وفرق توقيت".

 

هيفاء وهبي

المعروف في بدايتها إنها مغنية اينعم مش مطربة بمعنى الكلمة يعني أغانيها من النوع المختلف والخفيف مش اكتر، لكن بعدها دخلت مجال التمثيل، وبقت من الفنانات اللي بيدخلوا المنافسة الرمضانية يعتبر كل عام، وانضمت لقائمة فنانين التمثيل وليس الغناء، وده شفناه في "كلام على ورق ، ومريم، ولعنة كارما"، أما بالنسبة للسينما "دكان شحاتة، وحلاوة روح".

 

خالد سليم

أعمال كتير ما استغلش فيها خالد سليم، صوته وقرر الظهور والاكتفاء بالتمثيل فقط، ليترك الغناء في أوقات تانية منها الحفلات الغنائية والبرامج التليفزيونية، وعلي سبيل المثال "ولاد تسعة، واختيار اجباري، وجبل الحلال، ومأمون وشركاه" وأخرهم مسلسل "رسايل".


دياب

رغم أنه مطرب، ومشهور بأغانيه اللي ليها طابع خاص، إلا أنه لما قرر يدخل مجال التمثيل كسر القاعدة تماما، علشان يثبت قدراته واكتفى بدور الممثل وبس، ونجح في إقناع الجمهور من خلال عدة أعمال درامية منها "ساحرة الجنوب، كلبش، صد مجهول، أيوب".