مفاجأت كتير ما تخليهاش تفوتك.. "الزيتونة" في نهاية مسلسلات رمضان

الاثنين 18 يونيو 2018 15:30
كتب: محمد عباس , ندا عصام

طبعا الناس كلها كانت مشغولة بماتشات كأس العالم بصفة عامة، وبمباراة المنتخب المصري ضد اورجواي في كأس العالم 2018 بصفة خاصة، وازاي هيتفرجوا ويتجمعوا مع اصحابهم، وده اللي خلى معظمهم مايلحقش يتفرج على الحلقات الأخيرة من مسلسلات رمضان، وعلشان كده قررنا نقول لكم النهاية كانت عاملة ازاي. 


رحيم.. "نهاية مأسوية" 

الكل اتفاجأ في الحلقه الأخيرة من مسلسل "رحيم" محدش كان متوقع ان "رحيم" يموت خصوصا أن في بداية الحلقة الحقيقة بانت واكتشفنا أن "رحيم" طلع شغال مع الحكومة مش زي ما كنا متصورين، مع اغنية النهاية"اشوفكوا بخير" بصوت المبدع مدحت صالح، ومن هنا الجمهور انقسم لمؤيد ومعارض فمنهم أعجب بالنهاية والجزء الآخر لم تعجبه على الإطلاق.. "نكدوا علينا في العيد".


الوصية.. "مفاجآت الفلاشة والنهاية السعيدة"

فى الحلقة الأخيرة من "الوصية" الكل كانت الابتسامة مرسومة على وجهه ده غير ان في مفاجآت حلوة، اكتشفنا أن شاهيطاز طلعت بنت صاحب شركة "النويري" و"إبو" طلع من ضمن الأيتام اللي بيبحث عنهم، واختتمت الحلقة بأغنية سعيدة جمعت" إبو" وحبيبته شاهي" وسمسم" وحبيبته" بطة".. فالحقيقة الجمهور انبسط.. "اسعدوتنا والله".


ضد مجهول.. "مفيش مفاجأة خالص" 

مكنش في مفاجأه في نهاية "ضد مجهول" زي ما عودتنا غاده عبد الرازق في مسلسلاتها، وطلع أن اللي اغتصب وقتل بنت "ندى" هو شقيق الكوافيرة "دياب" وخدت غادة حق بنتها وخطفته في الصحراء وحبسته في قفص وولعت فيه "نهاية مؤلمة بس كان لازم".


أمر واقع.. "الميت ماطلعش ميت"

المفاجأة أن نبيل الحلفاوي "أحمد هدايت" طلع عايش واستقرت علاقة حمزة بزوجته"كما داليا" نجلاء بدر، وأنجبت منه ابنا، وبدأت قصة حب بين ملك قورة "خديجة" ومحمد عادل" سامح".


كلبش ٢ "عايش ومش عايش"

وزي ما قال الهضبة في اغنيته "انا عايش ومش عايش" دي كانت نهاية سليم الأنصاري، فقبل ما يتعدم هيثم أحمد زكي "عاكف" هدده وكانت نهايته انه مات، بس في اللحظات الأخيرة الجمهور كان في حالة ذهول وطلع عايش بس كان لازم يعمل نفسه ميت علشان أهله يعيشوا في امان وسلام، ومن هنا في احتمالية وجود جزء ثالث ل" كلبش".." المفاجأة حلوة مفيش كلام".

الرحلة.. "نهاية عذاب الناس اللي بره دول"

كان طبيعي ان دكتور أسامة اللي بيجسد شخصيته باسل خياط يتم حبسه و عقابه على اللي عمله فينا طول المسلسل، وكانت صدمة الحلقة الأخيرة هي لحظة موت كارما اللي بتقوم بدورها ثراء جبيل في حادثة.