منهم النفيخة وباتا.. 5 حاجات يخلوا كليب تامر حسني يتشاف

الاثنين 16 يوليو 2018 13:11
كتب: ندا عصام

امبارح الكل كان مشغول بختام نهائي كأس العالم وردود الأفعال بعد أخر مباراة، وفجأة الجو هدي وتامر حسني، طرح كليب أغنيته الجديدة "عيش بشوقك" وهي من البومه الجديد، ودي عودة ليه بعد غياب سنتين، السوشيال ميديا كلها مش بتتكلم عن حاجة من إمبارح للنهاردة غير الكليب خصوصًا أنه حالة مختلفة تمامًا، ده غير أنه قرب على المليون مشاهدة، وكان في أكتر من حاجة خلت الكليب يحقق نجاح، ويستاهل الفرجة عليه.



1 – من أكتر الحاجات اللي الناس خدت بالها منها والتعليقات كانت على نفس الموضوع، هي كمية البهجة والطاقة الإيجابية الموجودة بالكليب، تامر فعلا رسم البهجة والابتسامة على وجوه كل اللي شاف الكليب.



2 – تامر حسني استخدم كلام خفيف في الأغنية، زي أغانيه القديمة "حضن الغريب"، و"أوصفلك"، اللي ماحدش فينا مش فاكرها، فمن ضمن الكلمات اللي تامر، قالها وعجبت الناس أوي "باتا" فقال إيه بقى: " وإن كنت مفلس خالص خالص، وما حيلتكش جنيه.. قول ع الجزمة الباتا اللي أنت لابسها إنها سينييه.. مثل ع الدنيا في عز الفقر إن أنت سعادة البيه".



3 – اهتمامه بشكل المزيكا واللحن، شهد اختلاف كبير جدًا، تامر في "عيش بشوقك" التنويع وصل بيه أنه يختم الأغنية بحاجة أشبه بالموال، ولكن على طريقته الكوميدية فقال: "خد يابني مني الكلمة دي اصرف ما في الجيب، واشحت بكرة عادي".



4 - عناصر جديدة استخدمها تامر حسني، زي الوان الديكور المبهجة، وحاجات كتير تاخد عينيك، كان أهمهما محمد السواح، مؤسس فرقة النفيخة اللي قدم وصلة عزف صولو، عجبت الناس جدا.



5 – على الرغم من أن الكليب محقق نجاح كبير، إلا أن في ناس على السوشيال ميديا قاله أنه بيقلد كليب "happy "، وفي النهاية شوفوا الكليب وانتوا احكموا.