وقوع ع المسرح و سوستة فستان.. أكثر 7 مواقف محرجة للنجمات

الأربعاء 27 يونيو 2018 13:15
كتب: ندا عصام

الطبيعي إن أي فنانة تحب أن يراها جمهورها بكامل شياكتها وأناقتها خلال حفلاتهم الغنائية واستعدادتهم الكاملة لكل ما سيحدث في الحفل من حيث الملابس "اللي هتاكل الجو"، والأغاني المعينة اللي هتغنيها، لكن بقى الغير طبيعي إننا نشوف مواقف تخليهم "في نص هدومهم"، وأهم موقف ممكن يبقى السبب في كده هو سقوطهم من على خشبة المسرح، وكل واحدة بشكل مختلف عن الأخرى، كل موقف حصل كان له فيديو انتشر بشكل مهول على السوشيال ميديا، وتسبب في كمية تريقة ما تتوصفش، فاكرين اللحظات دي ؟!.. طيب ما تيجوا نشوف.

 

وقعة شيرين

في حفل لشيرين عبد الوهاب، بدبي كانت مندمجة على الآخر، وهي بتغنى وبترقص وحاجة كدة أخر "بهججة"، وفجأة وبدون مقدمات وقعت من على المسرح، وهو ما وضعها في موقف محرج جدًا، والفيديو انتشر على السوشيال ميديا بشكل كبير، وده مش أول موقف لشيرين ساعتها.. "وقعة وقعة يعني مفيش كلام".


 


هيفاء وهبي "ما بعدش يا جيمي"

 هيفاء بقى مواقفها ماتتعدش من كترها، يعني مثلا وقعت مرتين اثناء نزولها على السلم، خلال حلولها ضيفه على برنامج المواهب الغنائي "ستار أكاديمي" في موسمه الرابع والسادس، مما جعلها في وقف لا بأس به، و اتخاذها قرار نزولها من على الحبل في الموسم التاسع "خلينا في الأمان برضه"، ده غير بقى حفل غنائي تاني ظهرت فيه وهي مرتدية حذاء أكبر من مقاسها الطبيعي، آدي إلى وقوعها للمرة الثالثة " لأ مفيش فايدة، دي مابتحرمش بقى".

  



 

سوستة نانسي عجرم

نيجي لنانسي عجرم، اللي اتعرضت لموقف صعب، ومحرج جدا قدام جمهورها على المسرح خلال حفل النادي الأهلي في الشيخ زايد، فأثناء اندماجها وغناء ها لعدد من الأغاني، فجأة" سوستة" الفستان اتقطعت، فسرعان ما تم تدارك الموقف، وساعدها مدير أعمالها بإعطائها "شال اسود" علشان تلحق تكمل الحفلة.. "ربنا ستر الحمدلله".

 



الطول مش دايما "هيبة"

موقف مايتنسيش لمايا دياب، لما كانت بتقدم حلقات برنامجها "هيك منغني" وأثناء تمايلها وحركات الدلع كعادتها، وقعت على المسرح وحاولت تستند على الكرسي لكن للأسف ملحقتش.. "ما يقع إلا الشاطر".


 

قولنا بلاش "طويل" يا إليسا

الظاهر كدة إن الفساتين الطويلة هي أزمات إليسا، في حفلاتها الغنائية، ففي حفل لها بالكويت كانت تغني أغنية "أول مرة تحب" فعند التفاتها للفرقة الموسيقية لم تنتبه وسقطت على المسرح بسبب طول الفستان، ولم تسلم وقتها من "التريقة"، وبعدها تعرضت لنفس الموقف تقريبا في حفل دبي، فلم تتمالك نفسها خلال غنائها أغنية "بتمون"، ومن غير قصد "داست" على الفستان وسقطت من على المسرح.. "بلاش طويل يا إليسا".



 


حتى "الست" أم كلثوم

حتى كوكب الشرق، اتعرضت لموقف لم يكن في الحسبان، فاثناء حفل لها في باريس، صعد شاب على المسرح كي يعبر عن حبه عشقه لها فامسك قدمها وحاول تقبيلها، ولكن عندما ابعدته سقطت من على خشبة المسرح، فموقف الصراحة مايتنسيش.


 


ملكة فستانها "مقطوع"

في حفل زفاف احيته الإماراتية احلام، تعرضت لموقف محرج جدا لم يكن في الحسبان، انتشر على صفحات مواقع الاجتماعي فيديو لها من الحفل أثناء تصوير نفسها على طريقة الـ"سناب شات"، وظهرت وفستانها ممزق من ناحية "الإبط"، وكتر وقتها الكلام عليها والجمهور استلمها، نقول إيه "حتى الملكة".