من "سوبر مان" لـ "أحلى حاجة دي ولا إيه".. الموضة أسامي الأغاني العجيبة

الأربعاء 1 أغسطس 2018 12:38
كتب: ندا عصام

من الواضح إن النجوم في مصر استقروا في الفترة الأخيرة إن الموضة هي استخدام أسامي أغاني غريبة أو بعيدة عن لونهم "الاستايل" اللي اتعودوا عليه.

 

وكان آخرهم المغربية سميرة سعيد، اللي اختارت اسم يثير الفضول، لأغنيتها الجديدة وهو "سوبر مان"، و ياريتها جت على اسم الأغنية وبس، لأ ده كمان شكلها، أثار حالة جدل كبيرة بعد ظهورها في البرومو بجسد ملئ بالوشم مما تعرضت لسخرية من رواد مواقع التواصل الاجتماعي، واتهموها أنها بتقلد الهضبة خصوصًا أنها ظهرت عارية "من فوق" زي ما عمرو دياب ظهر في بوستر البومه الجديد "كل حياتي" .. ناوية على إيه يا ديفا؟

 



ايهاب توفيق

ايهاب توفيق، قرر يتماشى مع الجيل اللي احنا فيه، ويتطور من نفسه في عالم الموسيقى زي مطربين كتير، ايهاب، هيطرح كليب جديد خلال الفترة اللي جاية صوره في المغرب، واختار اسمها يكون "احلى حاجة دي ولا ايه"، والمعروف أن نص الجملة الأخير كلنا بنستخدمه في كلامنا بعد انتشارها على السوشيال ميديا بشكل مهول، زي مثلا "احلى اغنية دي ولا ايه، احلى هدية دي ولا ايه".

 


إليسا

اليسا من ساعة ما نزلت البومها الجديد وهي بقت حديث السوشيال ميديا، بسبب اختيارها المميز لأغانيها، لكن لما حبت تروج للألبوك اختارت تطرح أغنية من ضمن الـ 16، وهي "مريضة اهتمام"، الكل وقف عند الاسم لأنه لأول مرة يستخدم، بنسمع اهتمام أه لكن مريضة اهتمام، دي جديدة، بس الحقيقة الأغنية حلوة من كلمات للحن لتوزيع ودي بشهادة اللي سمع الأغنية إضافة لنسبة المشاهدة اللي تخطت الـ 3 مليون على اليوتيوب، وفي النهاية إليسا، يعني الإحساس.


 


عمرو دياب

الهضبة يعني الجديد كله، أي حاجة بيعملها دايما بتبقى في صالحه مهما كان حتى الجدل عليها، عمرو دياب، قبل ما يطرح البومه الجديد "كل حياتي"، حب يمهد واحدة واحدة، ونزل أغنية بعنوان "ده لو اتساب"، الاسم لوحده يخليك تستغرب وتفكر، بس الصراحة الأغنية عجبت الجمهور أوي واعتبروها بداية موفقة للألبوم، يا ترى في إيه بعد لو إتساب؟