مين هو "مالكوم" بطل خناقة روما وبرشلونة؟

الثلاثاء 24 يوليو 2018 14:38
كتب: محمد جمال

كل اللي حصل في الميركاتو الصيفي كوم والخناقة اللي بين برشلونة وروما دلوقتي كوم تاني خالص.

من فترة دخل مسئولو نادي روما في مفاوضات مع لاعب برازيلي يدعى مالكوم يلعب جناح أيمن في فريق بوردو الفرنسي وكان قريب جدًا من الحصول على خدماته وقالوا إن دا اللي هيعوض محمد صلاح اللي رحل من موسم لفريق ليفربول.

وقبل توقيع اللاعب ظهر مسئولو برشلونة في الصورة وبدءوا يقنعوا اللاعب في التوقيع لهم بدلًا من روما ووعدوه بمستقبل كبير مع الفريق الإسباني.

أي لاعب هيتحط في الموقف دا لازم هيعيد النظر من جديد الفريقين اسمين كبار ولكن برشلونا أكبر وأهم طبعًا من ناحية البطولات وكمان من ناحية الفلوس.

حتى الآن اللاعب محسمش وجهته المقبلة وأن كان أقرب بكتير لبرشلونة من روما ولكن ما بين طرفة عين وانتباهها يغير الله من حال إلى حال.

ولكن عشان إيه الخناقة الكبيرة على اللاعب دا بين برشلونة وروما.

تعالوا بينا نعرف أصلًا مين هو اللاعب دا.. باختصار عشان مطولش عليك دا لاعب برازيلي عمره 21 سنة بدأ في صفوف فريق كورنثيانز البرازيلي واللي تدرج في فرق الناشئين حتى الظهور مع الفريق الأول في 2014 وهو عنده وقتها 16 سنة.

قدر مالكوم يكون له دور مهم جدًا في بطولة الدوري اللي فاز بيها مع الفريق البرازيلي وقدر يسجل أهداف حاسمة مش بس كدا لا وكمان صنع أهداف مهمة.

في الوقت دا قدر اللاعب أن يلفت أنظار كشافي فريق بوردو الفرنسي اللي قدروا يخطفوه ليهم.

مالكوم سجل 20 هدف في 84 مباراة شارك فيها مع بوردو بالدوري الفرنسي في موسمين ونصف وكمان صنع 13 هدف مع الفريق ليكون واحد من أهم اللاعبين في الفريق قبل ما تبدأ روما مفاوضاته.

اللاعب مركزه المفضل هو الجناح الأيمن لانه بيجيد اللاعب بقدمه اليسرى وله تسديدة قوية جدًا وسجل عن طريقها أكتر من هدف.

حاول مدرب بوردو أنه يستخدم مهارات وسرعة اللاعب وقرر يلاعبه في مركز صانع الألعاب ولكنه فشل في كل مرة في المساهمة بالتسجيل أو الصناعة.