5 نجمات في رمضان.. "عظمة على عظمة"

الاثنين 11 يونيو 2018 10:48
كتب: ندا عصام

رمضان السنة دي، اكتر من فنانة كان العين عليها مفيش حد ماتكلمش عن أدوارهم وشخصياتهم اللي كانت مفاجأه كبيرة اوي لجمهورهم ذاكروا كويس وعاشوا مع الشخصية علشان في النهاية تظهر بالشكل الفظيع ده، فتعالوا نشوف مين الفنانات اللي ابهرونا في رمضان.

روجينا

روجينا السنة دي مختلفة تماما عن أي موسم رمضاني، أدوارها مختلفة سواء كان في "كلبش2" أو "ضد مجهول"، لكن اللي "علم" مع الناس أكتر واتشد ليه هو "مايا القوادة" في مسلسل "ضد مجهول" اللي بتتسم بالشر وعدم الرحمة، و"الشرشحة" ونبرة الصوت العالية، روجينا بتعبيرات وجهها بتقدر توصلك اللي هي عايزة تقوله، من أول ظهورها لحد دلوقتي خطفت الأنظار والكل بقى يتكلم عنها، وعلى الرغم من خوفها من الشخصية إلا أنها أدتها ببراعة شديدة جدًا لدرجة أننا كرهناها الحقيقة بس بصراحة الدور ده أضاف لرصيدها الفني.. "وده مش جديد عليها".




حنان مطاوع

 بساطة وسهولة في الأداء مش ممكنة، تفوقت على نفسها من خلال أدوارها في رمضان الحالي، شخصيتين مختلفتين، يعني في مسلسل "الرحلة" تبان أنها شخصية قوية وجادة لكن في نفس الوقت لما اكتشفت أنها مريضة بالسرطان نظراتها ودموعها في لحظات ضعفها كانت "تقطع القلب" فمن الواضح إنها ذاكرت كويس الدور عشان كدة ظهر بالشكل ده، عكس شخصتيها تماما في مسلسل "ضد مجهول"، اللي السوشيال ميديا اتقلبت عليها خصوصًا أنهم معتقدين إنها "شبح" غادة عبد الرازق بسبب ضحكتها ونظراتها المريبة، فأدائها بصراحة من الصعب وصفه، لكن نقدر نقول إنها نجمة "على كل لون".




آيتن عامر

أبدعت وبرعت في شخصية "سماح" اللي بتقدمها في مسلسل "أيوب" شر وحقد وغل "كل دول مع بعض"، آيتن غير جلدها تماماً عما قدمته في أعمالها من قبل، وتحدت نفسها في دور الشر، وبالفعل نجحت فيه وكسبت والناس كرهتها بدرجة كبيرة وده بان على صفحات مواقع التواصل الاجتماعي، وهو ده اللي كانت عايزاه آيتن عامر.. "شريرة شريرة مفيش كلام".



صبا مبارك


 صبا مبارك، فنانة من العيار التقيل فاجأتنا كلنا بدورها في مسلسل "طايع" على الرغم من أنها للمرة الأولى تجسد دور صعيدية، ولكن ركزت، وذاكرت أوي عشان يطلع بالشكل الجميل ده، "مهجة" أجادت اللهجة الصعيدية وصدقناها جدًا في كل مشهد قدمته، وفي وقت ما كسبت تعاطف الناس لما ماتت وبقت تريند على "تويتر" خلت مصر كلها تتكلم على لحظة موتها دي.



ريهام عبد الغفور

ريهام، قدرات تمثيلية جبارة أثبتت فعلا أنها ممثلة تجيد تجسيد جميع الأدوار، وفي مسلسل "الرحلة" اللي بتقدم فيه شخصية "رانيا"  تعتبر من أصعب الأدوار اللي مرت عليها في حياتها، تركيبة مختلفة جدا نجحت فيها ببراعة شديدة، دور المرأة المقهورة المدمنة الأم، قدام "غول" تمثيل زي باسل خياط "حاجة مش سهلة"، غير شكلها اللي ظهرت فيه وتعمدت عدم وضع "ميكب" عشان يصدقها الجمهور.